Azərbaycan Respublikası Media və Yayım Şurasının təşəbbüsü ilə 2026-cı ilin noyabr ayında "Rəqəmsal Media Ayı" keçiriləcək.
Bu barədə Şuradan məlumat verilib.
Qeyd olunub ki, "Rəqəmsal Media Ayı"nın əsas məqsədi rəqəmsal media sahəsində bilik və bacarıqların inkişaf etdirilməsi, media savadlılığının artırılması, etibarlı və məsuliyyətli məzmun yaradıcılığının təşviqi, eləcə də gənclərin bu sahədə peşəkar inkişaf imkanlarının genişləndirilməsidir.
Ay ərzində müxtəlif hədəf qruplarını əhatə edən maarifləndirmə proqramlarının, praktiki təlimlərin, şəbəkələşmə görüşlərinin və media kampaniyalarının təşkili nəzərdə tutulur.
Mövzu ilə bağlı AZXEBER.COM-a açıqlamasında Mətbuat Şurası İdarə Heyətinin üzvü, Əməkdar jurnalist Azər Həsrət bildirib ki, bu cür maarifləndirici təşəbbüslərin keçirilməsi olduqca vacibdir:
"Çünki bilirik ki, hər kəs onlayn mediadan və rəqəmsal texnologiyalardan peşəkar səviyyədə istifadə edə bilmir. Xüsusilə yaşlı nəslin nümayəndələri, eləcə də kifayət qədər dünyagörüşü və savadı olmayan, müxtəlif sahələrdə çalışdığı üçün bu məsələlərə vaxt ayıra bilməyən insanların rəqəmsal media və texnologiyalardan lazımi səviyyədə yararlanması çətindir. Belə şəraitdə onların köməyinə məhz bu cür maarifləndirmə aylıqları və tədbirləri gəlir.
Düşünürəm ki, əvvəlki oxşar tədbirlər kimi, bu aylıq da faydalı olacaq. Əvvəllər bu istiqamətdə həftəlik tədbirlər də keçirilirdi və onların müsbət nəticələr verdiyini düşünürəm”.
Ekspert qeyd edib ki, burada əsas məqsəd yeni texnologiyalardan istifadə azadlığını məhdudlaşdırmadan insanların onlardan düzgün yararlanmasına nail olmaqdır:
"Yəni çalışmalıyıq ki, insanlar həm özlərini rahat ifadə edə bilsinlər, həm də onlayn mediadan və rəqəmsal texnologiyalardan istifadə edərkən dələduzların, fırıldaqçıların və digər xoşagəlməz niyyətli şəxslərin qurbanına çevrilməsinlər. Bunun üçün rəqəmsal mühitdə təhlükəsiz davranış qaydalarını bilmək və məlumatları düzgün qiymətləndirmək də vacibdir”.
Aynur Babazadə
