Son günlər dövlət qurumlarının kommunikasiya və PR yanaşmaları sosial mediada və ictimai diskursda müzakirə mövzusuna çevrilib. Bakı Metropoliteninin süni intellekt texnologiyası vasitəsilə tanınmış şəxsləri "metroya gətirməsi”, eləcə də Azərbaycan Dəmir Yolları QSC-nin (ADY) əməkdaşı olduğu iddia edilən xanımın ilk sərnişin kimi təqdim etdiyi videogörüntülər ictimaiyyət arasında müxtəlif reaksiyalar doğurub.
ADY həmin görüntülərlə bağlı yayılan iddiaları inkar etsə də, məsələ ətrafında suallar hələ də tam aydınlıq tapmayıb. Paralel olaraq, vətəndaşlar üçün xüsusi əhəmiyyət daşıyan Bakı–Tbilisi reysinin bərpası ətrafında yaranan kommunikasiya vəziyyəti də diqqət çəkir. İddialara görə, bu prosesin ictimaiyyətə təqdimatı ADY-nin İctimaiyyətlə Əlaqələr komandası tərəfindən gözlənilən peşəkar kommunikasiya nümunəsi kimi deyil, əksinə, böhran kommunikasiya mərhələsinə qədər gərginləşən uğursuz PR təcrübəsi kimi qiymətləndirilir.
"Viva" kommunikasiya agentliyinin rəhbəri, PR mütəxəssisi Vüqar Baba AZXEBER.COM-a açıqlamasında bildirib ki, PR-ın təməl vəzifəsi vətəndaşı məlumatlandırmaqdır:
"Vətəndaşla birbaşa işləyən qurumların PR fəaliyyəti bəzək yox, baza ehtiyaclar üzərində qurulmalıdır. PR-ın təməl vəzifəsi vətəndaşı məlumatlandırmaq, onun narahatlıqlarını aradan qaldırmaq və qurumla cəmiyyət arasında şəffaf körpü olmaqdır. Əgər bir qurumun fundamental xidmətləri ilə bağlı suallar və problemlər açıq qalırsa, orada edilən hər hansı kreativ kampaniya əks-effekt verəcək”.
Kommunikasiya eksperti deyib ki, bəzi strukturlarda "tortun üstündəki gül" sindromu yaşanır:
"Bəzi strukturlarda arada "tortun üstündəki gül" sindromu yaşanır. Yəni, tortun tərkibi, keyfiyyəti ilə bağlı müştərinin suallarını cavablandırmayıb onun üstündəki naxışlardan danışmaq qıcıq doğurur. Müəssisələrin PR strukturları təməl öhdəliklərini yerinə yetirmədən "bəzəkli" layihələr etdikdə bu, ictimaiyyət tərəfindən problemləri gizlətmək və ya diqqəti yayındırmaq cəhdi kimi qəbul oluna bilər”.
O bildirib ki, PR-ın ölçü vahidi inam və etibardır:
"Həssas məqamlarda diqqəti süni intellekt layihələri və ya maraqlı videolarla başqa yönə çəkməyə çalışmaq peşəkar kommunikasiya deyil. Bu, reklam çarxı kimi uğurlu görünə bilər, amma institusional PR baxımından uğursuz olacaq. Çünki PR-ın ölçü vahidi baxış sayı, "vau" effekti deyil, inam və etibardır. İnamın olmadığı yerdə isə ən bahalı reklam belə manipulyasiya təsiri bağışlayacaq”.
Şahanə Ziyad
