Elmar Məmmədyarov: "Çıxış yolu təkcə danışıqların davam etdirilməsi deyil, həm də əlaqələrin intensivləşdirilməsidir"
Dağlıq Qarabağ münaqişəsinin nizama salınmasına dair danışıqlar 20 ildir davam edir. Təəssüf ki, ərazilər hələ də işğal altındadır, etnik təmizləmələr aparılıb. Bunu jurnalistlərə açıqlamasında xarici işlər naziri Elmar Məmmədyarov deyib. Son 7 ildə xüsusilə intensiv danışıqların aparıldığını deyən nazir qeyd edib ki, 2004-cü ildən danışıqların nəticələrini əks etdirən Madrid prinsipləri adlandırılan daha konkret nəticələr əldə edilib: “Bu prinsiplər sülh sazişinin parametrlərini ifadə etmək üçün əsasdır. Bütövlükdə qəti təmas nöqtələri tapmağın mümkün olmadığını, bu prinsiplərin irəliyə doğru getmək və əsas sülh sazişi bağlamaq üçün yaxşı baza olduğunu dərk edən Azərbaycan tərəfi növbəti mərhələyə keçməyi və əsas sülh sazişi üzərində işə başlamağı təklif edir”. E.Məmmədyarov jurnalistlərin diqqətinə çatdırıb ki, Dağlıq Qarabağ münaqişəsi çoxşaxəli, mürəkkəb bir münaqişədir, müharibə faktoru, torpaqların geri qaytarılması problemi, böyük maliyyə problemləri var. “Hazırda tərəflər arasında etimad tədbirlərinin möhkəmləndirilməsinə dair müxtəlif təşəbbüslər var, Azərbaycan və erməni icmaları arasında ünsiyyət müşahidə edilir. Beləliklə, yeganə çıxış yolu təkcə danışıqların davam etdirilməsi deyil, həm də əlaqələrin intensivləşdirilməsidir”, - deyə nazir vurğulayıb. E.Məmmədyarov təmas xəttindəki münaqişələrin təhqiq olunması mexanizminin yaradılmasında guya Azərbaycanın törətdiyi əngəllər barədə E.Nalbandyanın çıxışını şərh edərək onu populist çıxış adlandırıb. Azərbaycanlı nazir qeyd edib ki, hər şeydən əvvəl mexanizmin, münaqişənin nə demək olduğunu başa düşmək lazımdır: “Burada müharibə faktoru var. Bu, əsl cəbhə xəttidir, bu, müharibədir, təkcə hərbçilər deyil, həm də dinc sakinlər həlak olur. Odur ki, Azərbaycan bu məsələnin həllinə heç cür mane ola bilməz və belə maneçilikdə maraqlı deyil”.
