Azərbaycanda elm və incəsənətin sintez olunduğu ilk multidissiplinar layihə hesab edilən "Galaxy” albomu və konsert proqramı tamaşaçılara təqdim olunacaq.
Bu haqda layihənin rəhbəri, bəstəkar Əsmər Behbudova AZXEBER.COM-a açıqlamasında deyib.
Xanım bəstəkar bildirib ki, "Galaxy” onun üçün sadəcə bir albom deyil, üç illik yaradıcılıq axtarışının və ruhsal kəşflərin nəticəsidir:
"Düz 3 il. Bu musiqiləri bəstələmək, hər notda kainatın sonsuzluğunu və ulduzların sükutunu hiss etmək üçün keçən kəşflərlə dolu bir zaman idi. "Galaxy” mənim üçün yalnız bir albom deyil; bu, üç illik ruhsal axtarışın, gərgin əməyin və ölkəmizin mədəniyyət məkanında ilk dəfə reallaşan, elm və incəsənətin kəsişdiyi multidissiplinar bir vizyonun bəhrəsidir”.
Əsmər Behbudova qeyd edib ki, layihə "Harmony Event Group” komandası ilə birlikdə hazırlanır və məqsəd sadəcə konsert deyil, immersiv təcrübə yaratmaqdır:
"Biz bu layihəni yalnız bir konsert kimi deyil, hər detalı incəliklə düşünülmüş immersiv bir təcrübə kimi ərsəyə gətirdik. Məqsədim tamaşaçıları yalnız musiqi ilə deyil, vizual və emosional olaraq da bu sonsuzluğun bir parçasına çevirməkdir”.
Konsertin 06 iyun 2026-cı il tarixində "Kapellhaus" məkanında keçiriləcəyi bildirilib. Gecədə rəqəmsal instalyasiyalar müəllifi Emin Mathers və Amethyst Band da çıxış edəcək.
Bəstəkar vurğulayıb ki, bu layihə Azərbaycan musiqi tarixində yeni bir mərhələnin başlanğıcı olacaq:
"Bu gecə musiqinin kainatın ritmi ilə qovuşduğu andır. Bu tarixi anın bir parçası olmağınız mənim üçün çox dəyərlidir”.
Aysel Hacızadə
