Azərbaycan–Türkiyə Parlamentlərarası İşçi Qrupunun rəhbəri, Milli Məclisin komitə sədri, akademik Əhliman Əmiraslanovun rəhbərlik etdiyi nümayəndə heyəti Şimali Kipr Türk Cümhuriyyətinə səfər edib.
AZXEBER.COM xəbər verir ki, səfər Şimali Kipr Türk Cümhuriyyəti Məclisinin sədri Ziya Öztürklərin dəvəti əsasında baş tutub.
Nümayəndə heyətinin tərkibində millət vəkilləri Ağalar Vəliyev və Heydər Əsədov da yer alıblar. Səfər çərçivəsində nümayəndə heyəti Şimali Kipr Türk Cümhuriyyətinin Prezidenti Tufan Erhürman, Məclisin sədri Ziya Öztürklər və Baş nazir Ünal Üstellə görüşlər keçirib.
Görüşlər zamanı Azərbaycan ilə Şimali Kipr Türk Cümhuriyyəti arasında münasibətlərin inkişafı və parlamentlərarası əməkdaşlığın genişləndirilməsi məsələləri müzakirə olunub.
Əhliman Əmiraslanov Şimali Kipr Türk Cümhuriyyətinin dövlət bayramı münasibətilə təbriklərini çatdırıb. O bildirib ki, Azərbaycan ilə Şimali Kipr Türk Cümhuriyyəti arasında mövcud münasibətlərin təməli Ümummilli Lider Heydər Əliyev tərəfindən qoyulub.
Milli Məclisin komitə sədri qeyd edib ki, Prezident İlham Əliyevin Şimali Kipr Türk Cümhuriyyəti ilə bağlı siyasəti də bu strateji xəttə əsaslanır və əlaqələrin daha da möhkəmlənməsinə xidmət edir.
O, son illərdə Azərbaycan Milli Məclisi ilə Şimali Kipr Türk Cümhuriyyəti Məclisi arasında əməkdaşlığın əhəmiyyətli dərəcədə inkişaf etdiyini bildirib.
Şimali Kipr Türk Cümhuriyyətinin Prezidenti Tufan Erhürman isə görüşdən məmnunluğunu ifadə edərək Prezident İlham Əliyevə salamlarını və təşəkkürlərini çatdırmağı xahiş edib.
O, Azərbaycan ilə Şimali Kipr Türk Cümhuriyyəti arasında qardaşlıq münasibətlərinin, eləcə də siyasi, iqtisadi, təhsil və mədəniyyət sahələrində əməkdaşlığın bundan sonra da inkişaf etdirilməsinin vacibliyini vurğulayıb.
Qeyd edək ki, Azərbaycan–Türkiyə Parlamentlərarası İşçi Qrupunun nümayəndə heyəti Şimali Kipr Türk Cümhuriyyətinin Sülh və Azadlıq Bayramı münasibətilə keçirilən rəsmi tədbirlərdə də iştirak edəcək.
