Azərbaycan Müdafiə Sənayesi Nazirliyi NATO standartlarına cavab verən 7.62x51 snayper tüfəngi yaradıb. Trend-in məlumatına görə, bu barədə jurnalistlərə müdafiə sənayesi naziri Yavər Camalov bildirib.
"Artıq bu tüfəngi biz yaratmışıq. Tüfəngin atış məsafəsi min metr, maqazin tutumu 10 güllə, çəkisi isə 7,1 kiloqramdır", - nazir deyib.
Camalov qeyd edib ki, bundan əlavə, "Yalquzaq" adı ilə yeni pulemyot istehsal olunub.
Nazirin sözlərinə görə, bu pulemyot əsasən kəşfiyyat və xüsusi təyinatlıların aktiv döyüş aparması üçün nəzərdə tutulub.
"Pulemyotun atış məsafəsi 380 metr, çəkisi 7 kiloqram, uzunluğu isə 1080 mm-dir", - Camalov deyib.
Nazir qeyd edib ki, bundan əlavə, 14.5 snayper tüfənginin təkmilləşdirilməsi istiqamətində müəyyən işlər görülüb.
"Snayper tüfənginin çəkisi 35 kq-dan 28 kq-a endirilib və bir sıra texniki dəyişikliklər aparılıb. Hazırda 23 mm snayper tüfənginin üzərində iş aparılır. Yəqin ki, bu 2013-cü ilin birinci yarısında yaranacaq. Və sonradan həmin məhsulun seriyalı istehsalına başlanılacaq", - Camalov deyib.
