Xəbər verdiyimiz kimi, gələn ildən Azərbaycanda avtomobil idxalı ilə bağlı vergi siyasətində dəyişikliklər qüvvəyə minəcək.
Yeni qərara əsasən, yalnız tam elektrikli avtomobillərin idxalı 1 il müddətinə ƏDV-dən azad ediləcək, hibrid və plug-in hibrid avtomobillərə isə bundan əvvəl tətbiq olunan vergi güzəştləri ləğv olunacaq.
Azərbaycan Avtomobil Dilerləri Assosiasiyasının İdarə Heyətinin sədri Eyyub Əliyev AZXEBER.COM-a bildirib ki, bu dəyişiklik ölkəyə gətirilən hibrid avtomobillərin qiymətlərinə təsir göstərəcək:
"Sözügedən dəyişiklik ölkəyə gətirilən hibrid avtomobillərin qiymətlərinə təsir göstərəcək. Avtomobilin dəyərindən asılı olaraq, əlavə vergi xərcləri qiymətin üzərinə gələcək.
Amma yaxşı tərəfi odur ki, elektrikli avtomobillərə tətbiq edilən güzəştlər davam edəcək. Mən ümid edirəm ki, bu proses hələ bir neçə il belə qalacaq”.
Ekspert deyib ki, Prezident İlham Əliyevin 2021-ci ildə imzaladığı "Azərbaycan 2030: Sosial-İqtisadi İnkişafa Dair Milli Prioritetlər” adlı sərəncamı mövcuddur:
"İlham Əliyevin 2021-ci ildə imzaladığı "Azərbaycan 2030: Sosial-İqtisadi İnkişafa Dair Milli Prioritetlər” adlı sərəncamı var. Həmin sənədin 5-ci bəndi "Təmiz ətraf mühit və yaşıl artım ölkəsi” adlanır. Bu məqsədə nail olmaq üçün digər sahələrdə olduğu kimi, nəqliyyat sahəsində də dönüş yaratmaq, xüsusi diqqət yetirmək lazım idi və məhz bu sərəncamdan sonra belə də oldu. Sərəncamı nəzərə alaraq mən hesab edirəm ki, 2026-cı ildən 2030-cu ilə qədər tam elektrikli avtomobillərin ölkəyə güzəştli şərtlərlə gətirilməsi və satışı davam edəcək”.
E.Əliyev qeyd edib ki, rəsmi dilerlər tərəfindən süni qiymət artımı olmayacaq:
"Rəsmi dilerlər tərəfindən süni qiymət artımı olmayacaq. Sadəcə, tətbiq olunan vergi dərəcələrinin qiymətə əlavə olunması nəticəsində artım müşahidə ediləcək. Bununla yanaşı, avtomobil qiymətləri, bilirsiniz ki, logistika xərclərinə və ya istehsalçı zavodların qiymət artımlarına görə də dəyişə bilər. Hazırda logistika və istehsalçı zavodlar tərəfindən qiymət artımı yoxdur”.
Şahanə Ziyad
