Azərbaycanda ilk dəfə yeniyetmələr arasında "Caspian Junior Cup 2026” beynəlxalq qolf turniri təşkil olunub.
AZXEBER.COM xəbər verir ki, yarış Quba Palace Hotelin nəzdində fəaliyyət göstərən The National Azerbaijan Golf Clubda hotelin təşkilatçılığı ilə baş tutub.
Turnirdə Qazaxıstan, Özbəkistan və Qırğızıstanın milli qolf federasiyalarını təmsil edən gənc idmançılar iştirak ediblər. Yarış beynəlxalq yeniyetmələr üçün təşkil olunan qolf düşərgəsinin yekun tədbiri olub.
Mükafatlandırma mərasimində iştirakçı ölkələrin Azərbaycandakı diplomatları, dövlət qurumlarının nümayəndələri, media təmsilçiləri və digər qonaqlar iştirak ediblər.
Qeyd edək ki, "Caspian Junior Cup 2026” turnirinin əsas məqsədi uşaq və yeniyetmələr arasında qolf idman növünün inkişafına dəstək vermək, regional idman əməkdaşlığını gücləndirmək və Azərbaycanın beynəlxalq qolf xəritəsində mövqeyini daha da möhkəmləndirməkdir.
