Abşeron rayonunun Xırdalan şəhərində avqustun 23-də məişət münaqişəsi zəminində 1990-cı il təvəllüdlü Hüseynov Samir Namiq oğlu anasını, 1973-cü il təvəllüdlü Hüseynova Sevda Ələddin qızını bıçaqlayıb. Bu barədə ANS-ə Abşeron RPŞ-nin müstəntiqi Məhəmməd Tağıyev bildirib. 21 yaşlı Samir Hüseynov onu həyata gətirib min bir əzab-əziyyətlə böyüdüb boya-başa çatdıran anası Sevda xanımı həyatdan məhrum etməyə cəhd göstərib. Amma oğulun istəyi həyata keçməyib. Belə ki, Samirin vurduğu bıçaq zərbəsi ağır olsa da, ananın həyatını xilas etmək mümkün olub. Samir anasını yemək üstündə yaranan mübahisə zəminində bıçaqlayıb. Hadisə günü Sevda Hüseynova oğluna həyat yoldaşı ilə birlikdə ailənin digər üzvlərindən gizlincə şam etməsini irad tutub. Bu isə sonda Samirin bıçağa əl atması ilə nəticələnib. «İki nəfərlik yemək var idi. Dedim yoldaşımla otaqda ayrıca yeyim. Qapını açdı, soruşdu biz adam deyilik, tək niyə yeyirsiniz? Sözləşdik. Dedi ki, arvadını, uşağını da götür çıx evdən. Mən də əsəbləşdim vurdum», - deyə cinayətkar oğul Samir Hüseynov vurğulayıb. Anasını bıçaqlayan oğul bir müddət əvvəl ailə həyatı qurub və bu ilin iyul ayında övladı dünyaya gəlib. Həyat yoldaşı uşaq saxlamaq sahəsində təcrübəsiz olduğundan Samir Hüseynov bir müddət imiş ki, yoldaşı ilə birlikdə anası evində qalırmış. Hadisədən sonra az da olsa vicdanı sızlayan Samir Hüseynov anasını Təcili Tibbi Yardım maşını ilə xəstəxanaya çatdırıb. Polislər onu elə xəstəxananın həyətində həbs edərək şöbəyə gətiriblər. Faktla bağlı Samir Hüseynov barəsində Abşeron rayon polis şöbəsində Cinayət Məcəlləsinin 126.1 “Qəsdən sağlamlığa ağır xəsarət vurma” maddəsi ilə cinayət işi başlanılıb. Bir qarın yeməyi ana sevgisindən üstün tutan Samir Hüseynova yekun cəza isə məhkəmənin verəcəyi hökmdən sonra bəlli olacaq.
//Ans Tv
