Azərbaycanın sosial müdafiə sahəsində tətbiq olunan proaktiv xidmət təcrübəsi beynəlxalq platformada təqdim edilib.
AZXEBER.COM xəbər verir ki, Böyük Britaniyanın layihə idarəçiliyi üzrə ixtisaslaşmış "Project Controls Expo" platformasında Azərbaycanın sosial təminat sistemində tətbiq edilən proaktiv xidmət mexanizminə həsr olunmuş məqalə dərc olunub.
Məqalədə Əmək və Əhalinin Sosial Müdafiəsi Nazirliyi tərəfindən proaktiv təyinat mexanizminə keçid prosesi, bu sistemin üstünlükləri və vətəndaşlara yaratdığı imkanlar barədə ətraflı məlumat verilir.
Qeyd olunur ki, proaktiv mexanizm sayəsində pensiya, müavinət və digər sosial ödənişlər vətəndaşın müraciəti və əlavə sənəd təqdim etməsinə ehtiyac olmadan avtomatik təyin edilir.
Bildirilib ki, sistem Nazirliyin Mərkəzləşdirilmiş Elektron İnformasiya Sistemi ilə 80-dən çox dövlət informasiya sistemi arasında məlumat mübadiləsi əsasında fəaliyyət göstərir. Hazırda 55 növ sosial ödəniş proaktiv qaydada təyin olunur.
Vurğulanır ki, nüfuzlu beynəlxalq platformada bu təcrübəyə yer verilməsi Azərbaycanın sosial müdafiə sahəsində rəqəmsal transformasiya istiqamətində əldə etdiyi uğurların beynəlxalq səviyyədə tanındığını göstərir.
