Azərbaycanlı deputat: ”Burada sizə kömək yoxdur, ağ bayraq qaldırıb Ermənistana gedin və onlara tabe olun"

Milli Məclisin deputatının qəbuluna gedən məcburi köçkünə Ermənistandan kömək istəmək tövsiyə olunub. Bu barədə “Yeni Müsavat”a Kəlbəcər rayonundan olan məcburi köçkün Alagöz Vəli qızı Verdiyeva məlumat verib.A.Verdiyeva deyir ki, rayonları işğal olunandan sonra ailə üzvləri ilə birlikdə bir müddət Tərtərdə, sonra isə Goranboyda məskunlaşıblar. Onun dediyinə görə, maddi durumları pis olduğu üçün işləmək üçün bacısı Qərənfil Verdiyeva ilə birlikdə Bakıya gəliblər: “75 yaşlı anam Xuraman Verdiyeva hazırda iki bacımla birlikdə Goranboyun Veyisli kəndində yaşayır. Onların yaşadığı ev başqa adamındır. Sadəcə, məcburi köçkün olduğumuz üçün orada qalmağımıza şərait yaradıblar. Bacım Qərənfillə mən Həzi Aslanov qəsəbəsində kirayədə yaşayırıq. Kafelərdə qab yumaq və təmizlik işi ilə məşğul olaraq çörəkpulu qazanırıq. Goranboyda məcburi köçkünlərə ev tikilib paylananda bizə ev verilməsi haqda müraciət etdik. Bildirdilər ki, biz Tərtərdə qeydiyyatda olduğumuz üçün bizə Tərtərdə tikilən evlərdən veriləcək”.A.Verdiyeva onların rayonundan seçilən deputat Cavid Qurbanovdan da şikayət etdi: “İyun ayında bacım günün altında işlədiyi üçün səhhətində problem yarandı. Ona günvurma diaqnozu qoyuldu. Həmin vaxt o, həm də infarkt keçirdi və bir ay Semaşko adına xəstəxanada müalicə aldı. Maddi durumumuz ağır olduğu üçün onu müalicə etdirə bilmirik. Bacımın xəstəliyi ilə yanaşı digər problemlərimizə kömək etməsi üçün deputat Cavid Qurbanovun qəbuluna getdim. Amma o, məni qəbul etmədi. Sonralar dəfələrlə onun qəbuluna getsəm də yenə qəbul etmədi. Sonuncu dəfə Cavid Qurbanovun qəbuluna gedəndə onun qəbuluna gələnləri siyahıya alan Həbib adlı şəxs dedi ki, deputatın sizə borcu yoxdur və o, sizi qəbul etməyəcək. Sonra Həbib üzünü mənə tutaraq ”Azərbaycanda sizə kömək yoxdur, ağ bayraq qaldırıb Ermənistana gedin və onlara tabe olun" dedi. Bundan sonra Cavid Qurbanovun qəbuluna getmədim".A.Verdiyeva problemlərinin aradan qaldırılması üçün Kəlbəcər Rayon İcra Hakimiyyətinə də müraciət etdiyini, amma oradan ona yardım edilmədiyini söylədi: “Yayda ”Azadlıq" metrosunun yaxınlığında Cavid Qurbanovun qardaşı ilə görüşüb ona problemlərimiz haqda ona danışdım. O, yanımızda Kəlbəcərin icra başçısının Aqil adlı köməkçisi ilə telefonla danışandan sonra onun yanına getməyimizi məsləhət gördü. Anamla birlikdə Aqilin qəbulunda olduq. İcra başçısının köməkçisi bizimlə söhbət zamanı “Cavid Qurbanovun atasının 9 ferması var. Gedin, o, sizə köməklik etsin. Maaşımdan sizə verən deyiləm” dedi. Sonra icra başçısı Vidadi Məhərrəmovun qəbuluna getdik. O da dedi ki, cibimdən sizə kömək edə bilmərəm, gedin, hökumət kömək etsin".A.Verdiyeva hazırda bacısının durumunun ağır olduğunu və ölkə rəhbərliyindən onlara köməklik edilməsini xahiş etdi. Yazı ilə bağlı adları çəkilən şəxslərin mövqeyini çap etməyə hazırıq.