Bu gün səhər saat 7.00 radələrində Bakının Suraxanı rayonu, Zığ qəsəbəsi Göyüşov küçəsi, 96 B ünvanında bədbəxt hadisə baş verib. XI sinif şagirdi Baxışova Jalə Xanoğlan qızı dəm qazından boğularaq ölüb. Mərhumun ailəsindən verilən məlumata görə, Jalə səhər saatlarında məktəbə getməzdən əvvəl yuyunmaq məqsədi ilə evin hamam otağına girib. Atası qızının hamamdan gec çıxdığını görüb qapını döysə də, səs- səmir çıxmayıb. Hamam otağının qapısını sındıraraq içəri girən valideyinlər qızlarının yerə yıxıldığını görüblər. Təcili yardım cağırılsa da, 18 yaşlı Jalənin həyatını xilas etmək mümkün olmayıb.Xatırladaq ki, son 2 ildə dəm qazı uşaqlı-böyüklü 3000-dən çox insanın həyatına son qoyub. Təcili Tibbi Yardım Stansiyasından verilən məlumata görə, təkcə il başlayandan 150-dən çox insan dəm qazı zəhərlənməsi ilə Təcili Tibbi Yardıma müraciət edib. Mütəxəssislər zəhərlənmə hallarına əsas səbəb kimi düzgün qurulmayan qaz sobaları və təmizlənməyən tüstü bacalarını göstərirlər. “Səssiz ölüm” statusu qazanmış dəm qazı isə hələ ki, ünvanları səssiz gəzməkdə davam edir.
