Bu gün MDB-yə üzv dövlətlərin VI Bakı Beynəlxalq bank konfransı işə başlayıb.
AZXEBER.COM-un verdiyi xəbərə görə, ikigünlük konfrans “MDB-nin maliyyə bazarları Birlik məkanında iqtisadi inteqrasiyanın əsasıdır” mövzusundadır.MDB İcraiyyə komitəsinin icraçı katibi Sergey Lebedev konfransın MDB ölkələrinin maliyyə-iqtisadi əlaqələrinin daha da möhkəmlənməsində müəyyən rol oynayacağını deyib.Konfransda çıxış edən Mərkəzi Bankın baş direktoru Rəşad Orucov bildirib ki, Azərbaycan bank sektoru böhran dövründə dayanıqlılıq göstərib:“Böhran və post-böhran dövründə bank aktivlərinin orta illik artım tempi 16%-17% təşkil edib, məcmu kredit portfeli isə 20% artıb. Bu müddətdə bank sektorunda depozitlərin artımı da baş verib”.R.Orucov bildirib ki, hazırda dünyada tənzimləyici orqanlar tərəfindən maliyyə-bank sektoru ilə işin qurulması prinsipləri dəyişməlidir və artıq AMB da banklarla işini qabaqlayıcı tədbirlər əsasında qurur.Konfransda dünya maliyyə sisteminin qloballaşması şəraitində MDB-yə üzv dövlətlərin bank sistemlərinin fəaliyyəti məsələləri, pərakəndə bank xidmətləri bazarının inkişaf xüsusiyyətləri, regional, xüsusən də Xəzəryanı regionların inkişaf perspektivləri, MDB məkanında iqtisadi proqramlar, habelə digər aktual məsələlər müzakirə olunacaq.Plenar iclaslarda MDB iqtisadiyyatlarının inkişaf sürətinin azalması şəraitində maliyyə təsisatlarının artım ehtiyatları, birlik ölkələrinin maliyyə sektorunun investisiya cazibədarlığının artırılması faktorları, maliyyə təsisatlarının səmərəliyinin yüksəldilməsində insan kapitalının rolu və s. problemlərin müzakirəsi nəzərdə tutulur.
