Məlumdur ki, İsrail Fələstindən, İrandan sonra bu dəfə gözünü Suriyaya dikib və bu iki ölkə arasında qarşıdurma yaranıb.
Hətta keçid hökumətinin rəhbəri Əhməd Əl-Şəra Dəməşqi tərk edib.
Görəsən, İsrailin bu dəfə Suriyanı hədəfə alması nəyə işarədir?
Regionda hansı proseslər gözlənilir?
Məsələyə münasibət bildirən Milli Məclisin deputatı Naqif Həmzəyev AZXEBER.COM-a açıqlamasında bildirib ki, Əsəd rejiminin süqutu İsrailin diqqətini bu ölkəyə cəlb etməsinə yönəlib:
"Yaxın Şərqdə siyasi xəritə sürətlə dəyişir. İranla münaqişədən sonra İsrailin diqqətini Suriyaya yönəltməsi regionda yeni gərginlik mənbəyi yaratmışdır. Bəşər Əsəd rejiminin süqutu və prezidentin Dəməşqi tərk etməsi bu vəziyyəti daha da mürəkkəbləşdirmişdir.
İsrail bu siyasi dəyişikliklərdən sonra Suriya ilə əlaqədar fəal siyasət həyata keçirməyə başlamışdır. Son həftələrdə İsrail qüvvələri Dəməşqdə ordu qərargahını və prezident sarayının yaxınlığını hədəfə almışdır. Bu hərəkətlər İsrailin regiondakı yeni reallıqlara adaptasiya etmək cəhdinin təzahürüdür”.
Deputat qeyd edib ki, İsrailin Suriya ilə bağlı bir neçə planı var:
"İsrail rəsmiləri 2025-ci il ərzində Suriya ərazisindəki işğal bölgələrini saxlamaq niyyətlərini açıq şəkildə bəyan etmişlər. Bu bəyanat İsrailin uzunmüddətli strateji planlarına işarə edir. İsrailin bu hərəkətlərinin arxasında bir neçə əsas motiv durur.
Yeni Suriya hökumətinin İsrail üçün necə bir təhlükə yarada biləcəyi hələ qeyri-müəyyəndir. İsrail bu qeyri-müəyyənliyi özü üçün potensial təhdid kimi qiymətləndirir. Əsəd rejiminin süqutu İranın regiondakı nüfuzunu əhəmiyyətli dərəcədə zəiflətmişdir. İsrail bu boşluqdan faydalanmaq və öz regiondakı mövqeyini gücləndirmək istəyir”.
Millət vəkili əlavə edib ki, mümkün gərginlik böyüyəcək və regiondakı sabitliyi pozacaq:
"Suriya ərazisinin bir hissəsini nəzarət altında saxlamaqla İsrail gələcək mümkün təhdidlərin qarşısını almaq və özü üçün strateji üstünlük qazanmaq məqsədi daşıyır. Bu vəziyyətin inkişafı bir neçə istiqamətdə gözlənilir. İsrail-Suriya gərginliyi artacaq və bu, regionda ümumi sabitliyin pozulmasına səbəb ola bilər. Beynəlxalq ictimaiyyət tərəfindən diplomatik təzyiq artacaq və bu məsələ beynəlxalq gündəmdə önəmli yer tutacaq”.
Deputat sonda Azərbaycan-Suriya münasibətlərinə də toxunub:
"Azərbaycan İsraillə çox yaxşı münasibətdə olsa da Suriyanın ərazi bütövlüyünü dəstəkıəyir. Suriyanın ərazi bütövlüyünün qorunması və güclənməsi Türkiyənin də maraqlarına uyğundur.
Mikayıl Mirzəzadə
