Yarımçıq təmir edilən yol istifadəyə verilib.
Bir müddət əvvəl təmirə dayandırılan Binəqədi-Biləcəri yolunda təmir-bərpa işləri yarımçıq saxlanılıb. Ərazidə yaşayan sakinlərin AZXEBER.COM-a verdikləri məlumata görə, yolun DSK adlanan əraziyə qədər olan hissəsində yeni kanalizasiya xətlərinin çəkilməsindən sonra yolda müəyyən işlər görülməyə başlanılıb. Yol genişləndirilib və piyadaların sərbəst hərəkətini təmin etmək üçün səkilər düzəldilməsi nəzərdə tutulub. Ancaq bağlı qalan yol bir neçə həftə sonra yarımçıq istifadəyə verilib.
Sakinlərin sözlərinə görə, yolun yarımçıq istifadəyə verilməsi ərazidə baş verəcək qəzaların da sayını artıracaq:
“Yolun ortasında qum topaları da var ki, bu yarımçıq istifadəyə verilən yolda avtomobil qəzalarının da baş verməsinə səbəb ola bilər. Bununla yanaşı yolda işıqlandırma sisteminin olmaması da bu ehtimalı daha da gücləndirir”.
Məsələ ilə bağlı AZXEBER.COM portalı olaraq “Azəryolservis” ASC-nin mətbuat katibi Pünhan Mürsəliyevlə əlaqə saxladıq. Mətbuat katibi yolun yarımçıq istifadəyə verilməsi xəbərini yalanlayıb. O yolda hələ işlərin davam etdirildiyini bildirib.
“Xeyir yol hələ istifadəyə verilməyib. Yolda təmir işləri hələ də davam edir”.
P.S Əraziyə baxış keçirən əməkdaşımız isə yolda avtomobillərin hərəkətdə olduğunu və yolun yarımçıq istifadəyə verdiyini təsdiqləyib.
Ərazidən çəkilən fotoları təqdim edirik:
