Bakıda 'Təzyiq altında irs'

AZXEBER.COM-un Mədəniyyət və Turizm Nazirliyinə istinadən verdiyi məlumata görə, tədbir 26-29 aprel tarixlərində baş tutacaq. Belə ki, dünyanın 50-dən artıq dövlətinin nümayəndələrinin iştirakı ilə Azərbaycan Respublikasının Mədəniyyət və Turizm Nazirliyinin Birləşmiş Millətlər Elm, Təhsil və Mədəniyyət üzrə Təşkilatının (UNESCO) Ümumdünya İrs Mərkəzinin (WHC) məşvərətçi orqanları olan Mədəni mülkiyyətin mühafizəsi və bərpasının öyrənilməsi üzrə beynəlxalq mərkəzin (İCCROM) və Abidələr və Yerlər üzrə Beynəlxalq Şuranın (İKOMOS), eləcə də Azərbaycan Memarlıq və İnşaat Universiteti və İtaliyanın Romualdo Del Bianko Fondunun birgə tərəfdaşlığı ilə “Təzyiq altında irs – şəhərlərin tarixi landşaftlarının perspektivləri” mövzusunda beynəlxalq konfrans və ona əlavə tədbirlər keçiriləcək.Geniş auditoriya kütləsi üçün nəzərdə tutulmuş tədbirdə mədəni irsin mühafizəsi və inkişafı sahəsində fəaliyyət göstərən dünyanın ən nüfuzlu elm adamlarının, ekspertlərin və siyasətçilərin iştirakı nəzərdə tutulub.Bakı Konfransı tarixi şəhərlərin, xüsusilə də YUNESKO-nun Ümumdünya İrs Siyahısına daxil edilmiş və yaxud Ümumdünya İrs Obyektlərinin yerləşdiyi Bəşəri İrs Əhəmiyyətli şəhərlərin YUNESKO-nun Tarixi Şəhər Landşaftı ilə bağlı Tövsiyələri əsasında inkişaf tendensiyaları ilə bağlı olacaq, urbanizasiyasının şəhərlərin tarixən formalaşmış landşaftına təsirlərini araşdırmağa çalışacaq.