AZXEBER.COM xəbər verir ki, rusiyalı bədən aromaterapevti və "Ampermy" praktika mərkəzinin mütəxəssisi İrina Dobryanskaya "Moslenta" portalına açıqlamasında baş ağrıları zamanı istifadə oluna biləcək efir yağlarından danışıb.
Dobryanskaya bildirib ki, baş ağrıları üçün universal resept mövcud deyil. Bununla belə, həm klinik təcrübə, həm də elmi araşdırmalarla effektivliyi müəyyən qədər təsdiqlənmiş bir sıra efir yağları var.
Onun sözlərinə görə, nanə efir yağı baş ağrıları zamanı ən çox istifadə olunan vasitələrdən biridir. Bu yağ sərinlik hissi yaradaraq beynin ağrı siqnallarından yayınmasına kömək edir.
Lavanda efir yağı isə stres və yuxusuzluqla əlaqəli miqrenlər zamanı faydalı hesab olunur. O, sinir sistemini sakitləşdirir.
Roma çobanyastığı efir yağı əsəbilik hissini və boyun nahiyəsindəki gərginliyi azaltmağa kömək edir, həmçinin spazmolitik xüsusiyyətləri ilə seçilir.
Rozmarin efir yağı zehni yorğunluq və aşağı qan təzyiqi zamanı istifadə olunur.
Mütəxəssisin sözlərinə görə, bu yağ beyin damarlarının tonusunu artırmağa kömək edir.
Limon efir yağı isə güclü iltihabəleyhinə təsiri sayəsində boyun nahiyəsindəki döyünən ağrıların azalmasına kömək edə bilər.
Dobryanskaya vurğulayıb ki, yalnız 100 faiz təbii və sintetik qatqılar olmayan efir yağlarından istifadə edilməlidir. O qeyd edib ki, nanə və rozmarin efir yağlarının hamiləlik dövründə, xüsusilə ilk trimestrdə, eləcə də altı yaşdan kiçik uşaqlarda istifadəsi tövsiyə edilmir.
Mütəxəssis dozaya diqqət yetirməyin vacibliyini də xatırladıb. Onun sözlərinə görə, efir yağlarının həddindən artıq istifadəsi ürəkbulanma yarada və hətta baş ağrısını daha da gücləndirə bilər.
