Mətbuatda BDU-da təhsil alan tələbələrin dövlət imtahanı və diplom müdafiəsinin ləğvi ilə bağlı məlumatlar yayılıb.
AZXEBER.COM-un APA-ya istinadən verdiyi xəbərə görə, universitetin rektoru Abel Məhərrəmov bu barədə əmr imzalayıb. Əmrə görə, orta balı 81 və 81-dən yuxarı olan tələbələr dövlət imtahanından, orta balı 81-dən az olan tələbələr isə diplom işinin müdafiəsindən azaddırlar.
AZXEBER.COM məsələylə bağlı BDU-nun mətbuat və informasiya şöbəsinin rəhbəri Pərvanə İbrahimova ilə əlaqə saxlayıb.
P.İbrahimova informasiyanın hələ dəqiqləşdirilmədiyini bildirib:
“Ola bilsin ki, semestrlər ərzində qiymətləri A və B olan tələbələr dövlət imtahanından azad olunsun. Hələ ki, başqa bir yenilik haqqında informasiya yoxdur”.
AZXEBER.COM yeni qərarla bağlı adıçəkilən universitetin tələbələrinin də fikirlərini öyrənib.
BDU-da təhsil alan Səidə Əhmədova adlı 4-cü kurs tələbəsi bu qərarın tələbələrin dərslərdə daha aktiv iştirakı üçün stimul yaratdığını söyləyib:
“Əslində belə qərarın verilməsi çox xoş xəbərdir. Mənim indiyədək bütün qiymətlərim A və B-dir. Ona görə də çox şadam ki, biz dövlət imtahanından azad olunacağıq”.
Digər müsahibimiz Famil Məmmədov isə bu qərarın bütün tələbələrə aid edilməsinin tərəfdarıdır.
“İstəyərdim ki, ya dövlət imtahanı, ya da ki diplom müdafiəsinin ləğvi bütün tələbələrə şamil olunsun. Mənim qiymətlərimdə C və D də var. Təəssüf ki, biz dövlət imtahanı verəcəyik. Bilirsiniz ki, bunların hər ikisi məsuliyyətli işdir. Ona görə də düşünürəm ki, yaxşı qiymət almaq üçün bu imtahanın birini keçirtmək daha yaxşı olardı”.
Qeyd edək ki, bir müddət əvvəl sözügüdən təhsil ocağının tələbələri dövlət imtanının ləğv olunması üçün öz aralarında imza toplamışdılar.
Ayşə İsəzadə
