Berti Foqts: Dostum Böyükağa çox şən adamdır - MÜSAHİBƏ
İDMAN
10:50 08.12.2012
1518
Futbol üzrə Azərbaycan yığmasının baş məşqçisi Berti Foqts Azerisport.az saytına müsahibəsində “Neftçi”nin Avroliqada İtaliya “İnter”i ilə oyunundan, millinin seleksiya xarakterli toplanışından danışıb, eləcə də Böyükağa Hacıyevin onu duelə çağırmasına münasibət bildirib. - “Neftçi”nin “İnter”lə heç-heçəsi barədə nə deyə bilərsiz? - İtalyanların heyətində kimlərin oynamasından asılı olmayaraq “Neftçi”nin qazandığı nəticə çox yaxşıdı. Bu heç-heçəyə çox sevindim. Dostum Böyükağa Hacıyevi təbrik edirəm. - “Neftçi”nin bütövlükdə qrup mərhələsindəki çıxışını necə qiymətləndirirsiz? - Mən bakılıların iki ev oyununu da izləmişdim. Komandanın nəticələrinin yaxşı olduğunu düşünürəm. Yaxşı oyunlar sərgilədilər. Digər tərəfdən “Neftçi” unutmamalıdı ki, AFFA və Premyer Liqa klubları onlara çox güzəştə getdi. Onların bəzi oyunlarının təxirə salınmasını nəzərdə tuturam. Hətta demək olar ki, bu yolda, az qala, hamı onlara kömək etməyə çalışırdı. Bunun sayəsində Avropada Azərbaycanın klub futbolunun heç də zəif olmadığını bildilər. - “Xəzər Lənkəran”la “Bakı” arasındakı oyunu da izləmişdiniz... - Maraqlı oyun oldu, komandalar xeyli qol vəziyyətləri yaratdılar. Fikrimcə, qonaqlar qələbə qazanmağa daha çox yaxın idilər. Amma heç-heçəni də ədalətli nəticə sayıram. - Bir neçə gün öncə “Neftçi”nin baş məşqçisi sizin çalışdırdığınız yığmayla yoxlama oyunu keçirmək təklifi ilə çıxış etdi. Bunu necə qarşıladınız? - O, çox şən inşandı. - Bu, sizin ona cavabınızdı? - Mən onun bu sözünü çox əyləncəli və gülməli hesab edirəm. Başqa heç nə deyə bilmərəm. Almaniyada adətən karnavallar zamanı belə sözlər deyirlər ki, insanların əhval-ruhiyyəsi qalxsın. - Sözlərinizdən belə başa düşürük ki, yığmanın “Neftçi” ilə oyun keçirməsini istəmirsiniz... - Mən bunu şərh etmək istəmirəm. Çünki çox gülməli ideyadı. - Yığmanın seleksiya xarakterli son toplanışından yeni futbolçular tapa bildiniz? - 3-4 futbolçu özünü yaxşı tərəfdən göstərə bildi. Onları bir daha sınaqdan keçirəcəyəm. Həmin futbolçular gələn il bizimlə birgə Dubaya aparılacaqlar. Orda hazırlıqlarımız daha ağır olur. Onlar orda özlərini göstərməlidilər. - O, xoşbəxtlər hansılar olacaqlar? - Bunu üç həftədən sonra biləcəksiz. - Nə vaxta kimi Azərbaycandasız? - Toplanışdan sonra mən burda qalmağa, Premyer Liqanın oyunlarına baxmağa qərar verdim. Dekabrın 9-da gedəcəm.
