Bəxtiyar Hacıyev əsgərliyə gedir – EKSPERT RƏYİ

Hərbi xidmətdən yayındığı üçün 2 il müddətinə azadlıqdan məhrum edilən deputatlığa keçmiş namizəd, gənc fəal Bəxtiyar Hacıyevin əsgərlik məsələsi yenidən gündəmdədir. Cəzasının 1 ilini başa vurduqdan sonra bu ilin iyun ayında şərti azadlığa buraxılan Bəxtiyar Hacıyevin hərbi xidmət məsələsi qanunvericilikdə necə tənzimlənib? Bu suala cavab tapmaq üçün ekspertlərə müraciət etdik. AZXEBER.COM-un “Publika.Az”a istinadən verdiyi məlumata görə, vəkil Vaqif Hacıbəyli bildirib ki, vətəndaşın məhkumluq həyatı yaşaması heç bir halda onun hərbi xidmətdən yayınması üçün əsas ola bilməz. Vaqif Hacıbəyli vurğulayıb ki, şəxsin yüngül və yaxud ağır cinayət törətməsi də onu hərbi mükəlləfiyyətdən azad etmir. Hərbi ekspert Üzeyir Cəfərovhesab edir ki, Bəxtiyar Hacıyevin hərbi xidmət məsələsində bir qədər fərqli situasiya var: “Fərqli situasiya ondan ibarətdir ki, Bəxtiyar Hacıyev əslində, hərbi xidmətdən imtina etmir. O, sadəcə olaraq, Konstitusiyanın ona verdiyi hüquqlar çərçivəsində hərəkət edir. Belə ki, Bəxtiyar Hacıyev alternativ hərbi xidmət haqqında Konstitusiyanın müvafiq maddəsini rəhbər tutaraq, bu addımı atmışdı. Təəssüf ki, indiyə kimi Azərbaycanda alternativ hərbi xidmət tətbiq olunmur. Bu, Azərbaycanın Avropa Şurasına qəbul olarkən üzərinə götürdüyü öhdəliklərdən biri idi”. Üzeyir Cəfərov bildirib ki, vətəndaş iki ilə qədər həbs cəzası aldığı halda, onu hərbi xidmətə çağıra bilərlər: “Əgər həbs cəzası iki ildən çoxdursa, yaxud da törətdiyi cinayət ağır cinayətlər siyahısına daxildirsə, heç bir halda, həmin şəxsi hərbi xidmətə çağırmırlar. Bu baxımdan da, Bəxtiyar Hacıyevin hərbi xidmətə çağırılması mümkündür. İndiki halda, qanun onun hərbi xidmətə çağırılmasını qadağan etmir”.