Bu gün gənc fəal, keçmiş deputatlığa namizəd Bəxtiyar Hacıyev saxlandığı 14 saylı cəzaçəkmə müəssisəsindən Azərbaycan Respublikası Ədliyyə Nazirliyi Penitensiar Xidmətin Mərkəzi Müalicə müəssisəsinə köçürüləcək.Deyerler.Org-a daxil olan məluamata görə, Gənc fəalın saxlandığı 14 saylı cəzaçəkmə müəssisəsindən bildirdiklərinə görə, bu köçürülmə Bəxtiyar Hacıyevin səhhəti ilə əlaqədar deyil və müvəqqəti xarakter daşıyır. Gənc fəalın ailə üzvlərinin verdiyi məluamata görə isə köçürülmə Bəxtiyar Hacıyevin deyil, cəzaçəkmə müəssisəsi rəhbərliyinin təşəbbüsü ilə edilir. Səbəb olaraq, bu günlərdə Avropa Şurası İşgəncələr Əleyhinə Komitəsindən ölkəmizə gələcək nümayəndə heyətinin Bəxtiyar Hacıyevlə görüşmə tələblərinin təmin edilməsidir. Cəzaçəkmə Müəssisəsində hal-hazırda davam edən təmir işləri ilə əlaqədar belə görüş üçün uyğun şərait olmadığından rəhbərliyin təşəbbüsü ilə Hacıyev bir müddət Penitensiar Xidmət Müalicə Mərkəzində qalacaq.Dekabrın 6-da gənc fəalın işi üzrə Ali Məhkəmənin iclası keçiriləcək. Hakim İmran Hacıqayıbovun sədrliyi ilə keçiriləcək iclasda Bəxtiyar Hacıyevin iştirakının təmin edilib-edilməyəcəyi isə sual altındadır.Xatırladaq ki, gənc fəal, ABŞ-ın Harvard universiteti məzunu , 2010-cu il parlament seçkilərində deputatlığa namizəd olmuş Bəxtiyar Hacıyev bu il martın 4-də Gəncədə həbs edilib. May ayında Gəncə şəhər Nizami rayon məhkəməsi cinayət məcəlləsinin 321.1 (qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə təqsirli bilərək, gənc fəalı iki il azadlıqdan məhrum edib. Gəncə şəhər Apelyasiya məhkəməsinin hökmü qüvvədə saxlayan qərarından sonra Qaradağ rayon Qızıldaş qəsəbəsində yerləşən 14 saylı cəzaçəkmə müəssisəsində köçürülən Hacıyev 9 aydır ki, orada saxlanır.
