Son illər çoxmənzilli yaşayış binalarının idarə olunması, kommunal ödənişlərin toplanması və göstərilən xidmətlərin keyfiyyəti ilə bağlı narazılıqlar gündəmə gəlir.
Sakinlərdən binanın təmizliyi, liftlərin saxlanılması, ümumi ərazilərin işıqlandırılması və mühafizə xidmətləri üçün mütəmadi olaraq pul toplansa da, bəzi hallarda bu xidmətlərin lazımi səviyyədə göstərilmədiyi bildirilir. Belə vəziyyətlərdə sakinləri düşündürən əsas sual isə ödədikləri vəsaitlərin hara xərclənməsi və həmin pullara kimin nəzarət etməsidir.
Mövzu ilə bağlı AZXEBER.COM-a danışan əmlak məsələləri üzrə ekspert Elnur Fərzəliyev bildirib ki, çoxmənzilli binaların idarə olunmasında əsas məsələlərdən biri toplanan vəsaitlərin düzgün bölüşdürülməsi və xərclərin şəffaf şəkildə hesablanmasıdır:
"Mövcud qanunvericiliyə əsasən, çoxmənzilli binalar inşa olunub sakinlərə təhvil verildikdən sonra binanın idarə olunması ilə bağlı mənzil mülkiyyətçilərinin müştərək cəmiyyəti formalaşdırılmalı, sakinlərin keçirdiyi iclas əsasında idarə heyətinin sədri, inzibatçı və komendant seçilməlidir.
Binanın saxlanılması ilə bağlı bütün kommunal xərclər hesablanmalı və hesabat aparılmalıdır. Kommunal ödənişlərin məbləği hər kvadratmetrə uyğun müəyyənləşdirilir və yığılan vəsait binanın saxlanılmasına, o cümlədən ümumi ərazilərin işıqlandırılmasına, su anbarına xidmət göstərilməsinə, təmizliyə, mühafizəyə və digər zəruri xidmətlərə sərf olunur.
Kommunal xidmətlərə görə ödənişlər vaxtında yığılmalı, toplanan vəsaitin hara və necə xərclənməsinə sakinlər tərəfindən nəzarət edilməlidir”.
Ekspertin sözlərinə görə, bəzi binalarda sakinlərin kommunal ödənişləri etməkdən imtina etməsi idarəetmədə ciddi problemlərin yaranmasına səbəb olur:
"Bir çox binada sakinlərin bir qismi kommunal ödənişləri etməkdən imtina edir. Təbii ki, bu zaman binanın idarə olunmasında ciddi axsaqlıqlar yaranır. İstər mənzil mülkiyyətçilərinin müştərək cəmiyyəti, istərsə də tikinti şirkətləri tərəfindən idarə olunan binalarda bu cür problemlərlə qarşılaşmaq mümkündür.
Bina hansı qurum tərəfindən idarə olunmasından asılı olmayaraq, sakinlərin toplanan kommunal vəsaitlərlə bağlı sorğu göndərmək və hesabat tələb etmək hüququ var. Sakinlər ödədikləri vəsaitlərin hansı məqsədlər üçün xərcləndiyi barədə məlumat əldə edə və onların idarə olunmasına nəzarət edə bilərlər”.
Fəridə Əsədzadə
