Marketə daxil olan alıcı ilk baxışdan məhsulların çeşidinə, qiymətlərə və kampaniyalara diqqət yetirir.
Lakin əksəriyyətin fikir vermədiyi bir detal var. İri supermarket və mağazaların böyük əksəriyyətində satış zalında demək olar ki, pəncərə olmur. İlk baxışda adi memarlıq həlli kimi görünən bu yanaşma əslində marketinq strategiyasının bir hissəsidir.
AZXEBER.COM xəbər verir ki, bu yanaşmanın əsası XX əsrin ortalarında ABŞ-də qoyulub. Özünəxidmət supermarketləri geniş yayıldıqdan sonra mağazanın əsas "vitrini" küçədə deyil, satış zalının daxilində formalaşmağa başlayıb.
1956-cı ildə memar Victor Gruen ABŞ-nin Minnesota ştatında yerləşən "Southdale Center" adlı dünyanın ilk tam qapalı və iqlimə nəzarət olunan iri ticarət mərkəzini layihələndirib. Bu layihə müasir alış-veriş mərkəzlərinin başlanğıcı hesab olunur.
Maraqlıdır ki, Gruenin ilkin məqsədi insanları daha çox alış-veriş etməyə sövq etmək deyildi. O hesab edirdi ki, küçə ilə mağaza arasında vizual sərhəd aradan qaldırılmalıdır. Memarın məqsədi şəhər mərkəzlərindəki piyada mühitini şəhərətrafı ərazilərə daşımaq və insanların rahat vaxt keçirə biləcəyi ictimai məkan yaratmaq idi.
İstehlakçı davranışı üzrə aparılan tədqiqatlar göstərir ki, mağaza daxilində təbii işığın məhdud olması və xarici mühitin görünməməsi insanın zaman hissini zəiflədir. Alıcı çöldə havanın necə dəyişdiyini və günün hansı saatı olduğunu hiss etmədiyi üçün mağazada daha uzun müddət qalmağa meyilli olur. Mağazada keçirilən vaxt artdıqca isə planlaşdırılmamış alış-veriş etmə ehtimalı da yüksəlir.
Məhz buna görə də 1960-cı illərdən etibarən ABŞ-də tikilən iri supermarketlərin əksəriyyəti pəncərəsiz və ya minimum sayda pəncərə ilə layihələndirilməyə başlanıb. Sonradan bu model Avropa, Asiya və digər regionlarda da geniş yayılıb.
Fəridə Əsədzadə
