Xəbər verdiyimiz kimi, FIFA prezidenti Canni İnfantino Bakıya gəlib.
İnfantino səfər çərçivəsində Hövsanda inşa olunan meydançalara baxış keçirib. FIFA prezidenti qısa müddətdə istifadəyə hazırlanan 10 meydança ilə tanış olub.
Qeyd edək ki, bu, son illərdə Azərbaycana səfər edən ilk yüksək səviyyəli beynəlxalq idman rəhbəri deyil.
AZXEBER.COM son 20 il ərzində Azərbaycana səfər edən beynəlxalq idman qurumlarının rəhbərlərini araşdırıb.
Yozef Blatter – FİFA
FİFA-nın sabiq prezidenti Yozef Blatter Azərbaycana bir neçə dəfə səfər edib. Onun diqqətçəkən səfərlərindən biri 2011-ci ilin iyununda baş tutub. Blatter Azərbaycan futbolunun 100 illik yubileyi ilə bağlı keçirilən tədbirlərdə iştirak etmək üçün Bakıya gəlib.
Mişel Platini – UEFA
UEFA-nın sabiq prezidenti Mişel Platini 2011-ci ildə Azərbaycan futbolunun 100 illiyi ilə bağlı keçirilən tədbirlərdə iştirak etmək üçün Bakıya gəlib. O, həmin səfər zamanı Yozef Blatterlə birlikdə Bakı Olimpiya Stadionunun təməlqoyma mərasimində iştirak edib. Platini sonrakı illərdə də Azərbaycanda keçirilən futbol tədbirlərində iştirak edib. Onun səfərlərinin əsas mövzularından biri Azərbaycan futbolunun inkişafı və UEFA ilə əməkdaşlıq olub.
Canni İnfantino – FİFA
FİFA prezidenti Canni İnfantino 2017-ci ilin noyabrında Bakıya səfər edib. Səfərin əsas səbəblərindən biri FİFA İcraedici Futbol Sammitinin Bakıda keçirilməsi olub. İnfantino həmin səfər zamanı Prezident İlham Əliyevlə də görüşüb.
Aleksander Çeferin – UEFA
UEFA prezidenti Aleksander Çeferin 2016-cı ilin sentyabrında Azərbaycana səfər edib. Bu, onun UEFA prezidenti seçildikdən sonra Azərbaycana ilk səfəri olub. Çeferin səfər zamanı UEFA Avropa Liqasının qrup mərhələsində keçirilən "Qəbələ” – "Maynts” oyununu da izləyib. Çeferin 2021-ci ildə də Bakıda olub. Həmin vaxt UEFA prezidenti "Avro-2020” çərçivəsində Bakı Olimpiya Stadionunda keçirilən oyunlardan birində iştirak edib və Azərbaycan rəhbərliyi ilə görüşüb.
Tomas Bax – Beynəlxalq Olimpiya Komitəsi
Beynəlxalq Olimpiya Komitəsinin prezidenti Tomas Bax 2014-cü ilin noyabrında Bakıya gəlib. Səfərin əsas səbəblərindən biri Avropa Olimpiya Komitələrinin Bakıda keçirilən 43-cü Baş Assambleyasında iştirak etmək olub. Bax həmin səfər zamanı Prezident İlham Əliyevlə görüşüb. Bax 2015-ci ildə Bakı-2015 ilk Avropa Oyunlarının açılış mərasimində də iştirak edib.
Patrik Hiki – Avropa Olimpiya Komitələri
Avropa Olimpiya Komitələrinin sabiq prezidenti Patrik Hiki də Azərbaycana bir neçə dəfə səfər edib. O, 2014-cü ildə Bakıda keçirilən Avropa Olimpiya Komitələrinin Baş Assambleyasında iştirak edib. 2015-ci ildə isə Bakı-2015 ilk Avropa Oyunlarının əsas beynəlxalq idman rəsmilərindən biri olub. Hiki həm Oyunların məşəlinin yandırılması mərasimində, həm də açılış və bağlanış tədbirlərində iştirak edib.
Kirsan İlyumjinov – FİDE
Beynəlxalq Şahmat Federasiyasının (FİDE) prezidenti Kirsan İlyumjinov 2016-cı ildə Bakıda keçirilən 42-ci Ümumdünya Şahmat Olimpiadasında iştirak edib. İlyumjinov Bakıda keçirilən yarışın açılış mərasimində iştirak edib və Prezident İlham Əliyevlə görüşüb. Həmin Olimpiadada 175 ölkənin komandası iştirak edib.
Qeyd edək ki, Azərbaycan son 20 ildə yalnız futbol və şahmat deyil, müxtəlif idman növləri üzrə də böyük beynəlxalq yarışlara ev sahibliyi edib. Bakı-2015 ilk Avropa Oyunları, 2017 İslam Həmrəyliyi Oyunları, 2016 Şahmat Olimpiadası, UEFA Avropa Liqasının finalı və "Avro-2020”nin Bakı oyunları kimi yarışlar zamanı çoxsaylı beynəlxalq federasiya və idman təşkilatlarının rəhbərləri Azərbaycana gəliblər.
Fəridə Əsədzadə
