Jurnalistin həmkarları, yaxınları onun məzarını ziyarət edəcək
Bu gün reportyor Rasim Əliyevin qətlə yetirilməsinin 1 ili tamam olur. “Facebook” sosial şəbəkəsində yazdığı tənqidi statusuna görə 8 avqust 2015-ci ildə bir qrup şəxs tərəfindən vəhşicəsinə döyüləndən sonra 1 saylı Şəhər Klinik Xəstəxanasına yerləşdirilib. Bir neçə saat sonra burda dünyasını dəyişib.
Hadisənin baş verməsinə səbəb jurnalistin öz "Facebook" səhifəsində futbolçu Cavid Hüseynov haqda sərt tənqidi fikir yazması olub. Sosial şəbəkədə başlayan mübahisə sonda jurnalistin görüşə çağırılması ilə sona çatıb. Orada futbolçunun qohumları tərəfindən döyülən jurnalist xəstəxanaya yerləşdirilib. Ağır xəsarətlər alan jurnalist bir gün sonra keçinib. Rasim Əliyev ölməmişdən əvvəl verdiyi müsahibədə hadisəni təfsilatı ilə danışıb.
Jurnalistin döyülərək vəfat etməsi faktına görə Cinayət Məcəlləsinin 126.3 (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) və 177.1-ci (oğurluq) maddələri ilə Bakı şəhər Prokurorluğunda istintaqı aparılmış cinayət işi baxılması üçün aidiyyəti üzrə Bakı Ağır Cinayətlər Məhkəməsinə göndərilib.
Məhkəmə jurnalistin ölümündə təqsirləndirilən Elşən İsmayılov 13, Camal Məmmədov 11 il, Arif Əliyev 12 il 6 ay, Kənan Mədətov və Samir Mustafayev 9 il müddətinə azadlıqdan məhrum edilib.
Həmin cinayət işinin materiallarından Cavid Hüseynovun Cinayət Məcəlləsinin 307.1 (ağır cinayətin hazırlanması və törədilməsini bilərək həmin cinayət barəsində xəbər verməmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilməsinə dair hissə ayrıca icraata ayrılıb. Səbail rayon Məhkəməsinin hökumü ilə 4 il müddətinə azadlıqdan məhrum edilib.
Rasim Əliyev 16 avqust 1984-cü ildə Bakı şəhərində anadan olub. Ann.az xəbər saytının əməkdaşı olub, daha sonra “Obyektiv TV”-də foto müxbir kimi fəaliyyət göstərib. Rasim Əliyev 2007-ci ildən bəri Reportyorların Azadlıq və Təhlükəsizlik İnstitutunda reportyor, video və foto müxbir kimi çalışıb.
Bu gün saat 15:00-da R.Əliyevin Mehdiabad qəsəbəsində yerləşən məzarlığı həmkarları, yaxınları və ictimaiyyət nümayəndələri ziyarət ediləcək.
