İrlandiya 2027-ci ildə "Avroviziya" musiqi müsabiqəsində iştirak etməyəcək və İsrailin iştirakına görə onu yayımlamayacaq.
AZXEBER.COM "Times of Israel"ə istinadən xəbər verir ki, bu barədə İrlandiyanın ictimai yayım şirkəti "Raidió Teilifís Éireann" (RTÉ) bildirib.
"RTÉ "Avroviziya-2027"də iştirak etməyəcək və onun yayımından imtina edəcək", - yayımçının rəsmi bəyanatında qeyd olunub.
Şirkət nümayəndələri izah ediblər ki, bu qərar Qəzza zolağında davam edən humanitar böhranla əlaqədardır.
"Avroviziya"nın direktoru Martin Qrin RTÉ-nin mövqeyinə görə təəssüfləndiyini bildirib, eyni zamanda qəbul edilmiş qərara tam hörmətlə yanaşdığını vurğulayıb. Onun sözlərinə görə, Avropa Yayım İttifaqı (EBU) RTÉ ilə dialoqu davam etdirəcək və gələcəkdə İrlandiyanın müsabiqəyə qayıdacağına ümid edir.
2026-cı ildə EBU üzvlərinin əksəriyyətinin İsrailin "Avroviziya"da iştirakını qoruyub saxlamağa imkan verən islahatlar paketini qəbul etmək qərarından sonra İrlandiya Niderland, İspaniya, İslandiya və Sloveniya ilə birlikdə müsabiqəni boykot etmişdi. Niderland da 2027-ci il müsabiqəsində iştirakdan imtina etdiyini açıqlayıb.
Qeyd edək ki, "Avroviziya-2027" 11-15 may tarixlərində Bolqarıstanın Burqas şəhərində keçiriləcək.
