"15 mart mitinqi Milli Şuranın uğursuz aksiyalar seriyasının davamı oldu. Bu aksiya eyni zamanda sosial məsələlər üzərindən spekulyasiya edərək xal qazanmağa çalışan radikal müxalifətin öz mövcudluğunu qorumaq cəhdlərini də alt-üst etdi".

Bu sözləri Ölkə.az-a açıqlamasında "İslahatçı Gənclər" İctimai Birliyinin sədri Fərid Şahbazlı Milli Şuranın bugün keçirdiyi aksiyaya münasibət bildirərkən deyib. Onun sözlərinə görə, Bakı şəhər Baş Polis İdarəsinin məlumatına görə, bugünkü aksiyada AXCP, İslam və Xalq partiyalarının, eləcə də bir sıra müxalifətyönümlü qeyri-hökumət təşkilatlarının ümumi sayı 600 nəfərədək olan üzvü və təəssübkeşi iştirak edib: "Milli Şuranın bu aksiyasında həmişə olduğu kimi qurumda təmsil olunan partiyaların funksionerlərindən, bu partiyaların yedəyindəki gənclər təşkilatlarının üzvlərindən və bir sıra müxalif mətbuatın təmsilçilərindən başqa heç kim iştirak etmədi. Əgər bütün fəaliyyəti dövründə xalqın onları dəstəklədiyini iddia edən radikal qüvvələrin ortaq təşkil etdiyi mitinqə gələnləri sayı min nəfəri keçmirsə, bu, həmin qüvvələrin tamamilə iflasa uğradığına işarədir".

F.Şahbazlı qeyd edib ki, Azərbaycan xalqı ölkədə gedən prosesləri dəqiq müşahidə və analiz etmək imkanına malikdir: "Bu mənada radikal qüvvələrin müxtəlif məsələlər üzərindən spekulyasiya edərək ortalığı qarışdırmaq, divident qazanmaq cəhdləri bundan sonra da heç bir nəticə verməyəcək".