Serbiyadakı radikal sağçı "Naşi 1389" təşkilatı Türkiyənin ən populyar teleserialı sayılan "Muhteşem yüzyıl"ı Belqradda nümayiş etdirən telekanalı və serialın çəkiliş qrupunu məhkəməyə verib.
Təşkilatın rəhbəri Mişa Vasniç "Muhteşem yüzyıl"da Sultan Süleyman obrazının "olduğundan humanist" göstərildiyi və serblərin təhqir edildiyini bəyan edib. "Bu teleserialda türk sultanı insansevər, müdrik insan kimi göstərilib. Halbuki bu insan serb millətinə divan tutub, ölkəmizi işğal altında saxlayıb. Teleserialın nümayişinin dayandırılmasını, çəkiliş qrupunun da serb xalqından üzr istəməsini tələb edirik", - Vasniç deyib. Serbiya Xalq Hərəkatı ilə bağlı olan "Naşi 1389"un bu demarşının ölkədə keçiriləcək parlament seçkiləri ilə bağlı olduğu deyilir. Bu arada Vasniç teleserialda Hürrəm Sultan rolunu oynayan Məryəm Üzerlinin səhnələrdən birində Ukrayna dilində layla deməsini də "absurd" adlandırıb. (milli.az)
