Burkina Faso, Mali və Niger dərhal qüvvəyə minmək şərti ilə Beynəlxalq Cinayət Məhkəməsindən (BCM) çıxmaq qərarına gəliblər.
Bu barədə BBC məlumat yayıb.
Məlumatda bildirilir ki, hər üç ölkə hazırda hərbçilər tərəfindən idarə olunur və Rusiya ilə sıx əlaqələrə malikdir. Onlar yaydıqları birgə bəyanatda bildiriblər ki, artıq BCM-nin yurisdiksiyasını tanımırlar.
"BCM sübut olunmuş hərbi cinayətlərə, insanlığa qarşı cinayətlərə, soyqırım və təcavüz aktlarına görə məsuliyyət daşıyanları araşdırmaq və cəzalandırmaq qabiliyyətsizliyini göstərib", – Burkina Faso, Mali və Niger liderləri vurğulayıb.
Onlar həmçinin bildiriblər ki, "sülh və ədaləti möhkəmləndirmək üçün öz mexanizmlərini yaratmaq" niyyətindədirlər.
Xatırladaq ki, 2023-cü ildə Beynəlxalq Cinayət Məhkəməsi Rusiya Prezidenti Vladimir Putinin Ukraynada "hərbi cinayətlər törətməkdə ittiham olunaraq" həbsinə order verib. Bu orderi BCM-in yurisdiksiyasını tanıyan 125 ölkə yerinə yetirməyə borcludur.
Burkina Faso, Mali və Nigerin BCM-dən çıxması Putinin bu ölkələrə səfər etməsi üçün hüquqi maneələrin aradan qalxması kimi dəyərləndirilə bilər.
\apa
