Əhalinin narazılığına səbəb olan əsas məsələlərdən biri də ölkəmizdə təyyarə biletlərinin qiymətinin baha olmasıdır. AZAL-ın fəaliyyəti ilə bağlı narazılıq artıq illərdir davam edirdi. Biletlərin qiymətinin baha olması vətəndaşlarla yanaşı, Milli Məclisin deputatlarının da narazılığına səbəb olub.
Bəs AZAL-ın bundan sonrakı fəaliyyətində dəyişiklik olacaqmı? Biletlərin qiyməti ucuzlaşacaqmı?
AZXEBER.COM məsələ ilə bağlı Milli Məclisin deputatı Razi Nurullayevin münasibətini öyrənib.
Deputat qiymət siyasəti və digər məsələlərdə yaxın zamanda hiss ediləcək dəyişikliyin olmayacağını düşünür:
"AZAL-da hansı dəyişiklilərin gedəcəyi, hansı qərarların veriləcəyi cəmiyyəti düşündürür. Ancaq tezliklə qiymət siyasətində, insanların hiss edib, görə biləcəyi dəyişikliyin olmasını gözləmirəm. Bu barədə çox deyildi, danışıldı. Amma heç bir nəticə görə bilmirik. Cahangir Əsgərov vəzifədən alınması ilə, yaxın müddətdə müsbət dəyişiklik olacağına inanmıram. Artıq bu məsələlərdə bir az inamsız olmuşam. Hazırda AZAL-ın rəhbərliyini həyata keçirən şəxsin açıqlamalarından, qərarlarından çox şey aslıdır. Bundan sonra hansısa dəyişikliyin olacağından danışa bilərik. AZAL cənab Prezidentin sərəncamı ilə Rəqəmsal İnkişaf və Nəqliyyat Nazirliyinə həvalə olunub. Mənim Rəşad Nəbiyevə inamım var. Bu məsələrdə daha diqqətli olduğuna, insanların səsini eşitdiyindən xəbərdaram”.
Razi Nurullayev qeyd edib ki, bu qurumun fəaliyyətində dəyişikliklərin olacağına dair insanların gözləntisi var:
"Açığını deyim ki, mən müsbət nəticə gözləmirəm. Ancaq insanların gözləntisi var. AZAL dövlətin vəsaiti ilə maaliyyələşir. Bütün təyyarələr dövlətin pulu ilə alınıb. Dövlətin pulu ilə alınması o deməkdir ki, normal xidmət görmək təyyarədən istifadə edən insanların haqqıdır. Bu gün müşahidə edirik ki, Azərbaycan xalqının əksəriyyəti AZAL-dan narazıdır. Xalq narazıdırsa, demək ki, çox ciddi tədbirlər görülməlidir. Bəs bu tədbirlər görülürmü? Kağız üzərində deyilir, danışılır, ancaq real nəticə görə bilmirik”.
Şəbnəm Zahir
