"İki gənc deputat əlbəyaxa olub. Fuad Muradovla Ceyhun Osmanlı tədbirlərin birində “atışıblar” və bundan sonra F.Muradov həmkarını Milli Parkdakı çayxanaların birinə “razborka”ya çağırıb. C.Osmanlıya ağır sözlər deyən F.Muradov hətta ona bir sillə də çəkib. Bu məlumatı “Gündəm xəbər” qəzeti dünənki sayında dərc edib. Məlumatı verən mənbə iddia edib ki, iki gənc deputat arasında çoxdan idi “soyuq müharibə” gedirdi. Tədbirlərin birində isə artıq gərginlik kulminasiya nöqtəsinə çatıb və F.Muradov həmkarının cavabını verməli olub.Mənbə qeyd edib ki, tədbirdə deputatların sözü çəp gəlib: “Düzdür, onlar protokola uyğun olaraq tədbirdə yanaşı oturmuşdular. Amma aralarının sərin olduğu hər kəsə məlumdur. Hətta tədbir boyunca deputatlar bir-birilərinə söz atıblar. Nəhayət, Ceyhunun sözü Fuada xoş gəlməyib”.Qaynağın iddiasına görə, tədbir qurtarar-qurtarmaz F.Muradov həmkarını Milli Parkın ərazisindəki çayxanaların birinə dəvət edib: “Orada Osmanlıya ağır sözləri deyib və bir sillə çəkib”.Yayılan bu xəbərə ilk reaksiyanı deputat Ceyhun Osmanlı rəsmi “Facebook” səhifəsində verib. Deputat bununla bağlı yazdığı statusda məlumatı təkzib edib: “”Səviyyəli” qəzetlərdən birinin “səviyyəli” jurnalisti yazıb ki, Ceyhun Osmanlı və Fuad Muradov dalaşıblar, hətta məsələ əlbəyaxa döyüş səviyyəsinə çatıb. İndi Berlində konfransda Fuadla bu məqaləni müzakirə edib, gülürük. Jurnalistin “səviyyəsi” özünə qalsın, amma bele gülünc və sifarişli yazılarla jurnalistikanın imicini bu yerlərə gətirdiklərinə görə, qınayıram…” AZXEBER.COM-un məlumata görə, son zamanlara qədər araları "soyuq" olan millət vəkilləri bu yaxınlarda Azərbaycan gənclərinin 6-cı forumunda barışıblar. Bu xəbərin məhz bu ərəfədə, millət vəkilləri barışandan sonra çıxması da maraq doğurur. Mövzu ilə bağlı Fuad Muradovun da fikrini öyrənməyə çalışdıq. Amma millət vəkili telefonlarımıza cavab vermədi. Sonda qeyd edək ki, bəzi millət vəkillərinin jurnalistlərə saymazyana münasibəti, onların suallarından yayınmaları bu tip xəbərlərin yayımlanmasına təkan verir. Mövzuya yenidən qayıdacağıq.
