Xəbər verdiyimiz kimi, Rusiyadan Azərbaycana inşaat materialları daşıyan yük qatarının 3-4 vaqonu Siyəzən rayonunun Zarat qəsəbəsindən keçən hissədə relsdən çıxıb. Nəticədə vaqonlarda olan taxta və şalban kimi inşaat materialları dağılıb və sahibkarlara ciddi zərər dəyib. Ölən və xəsarət alanlarla bağlı hələki məlumat yoxdur. "Azərbaycan Dəmir Yolları” QSC isə məsələ ilə bağlı rəsmi məlumat verməyib. (Mənbə: Bizim.media)
Demokrat.az xatırladır ki, bu qəza hadisəsi birinci hal deyil. Bir neçə ay öncə Bakı–Tbilisi–Qars dəmir yolu xəttində baş vermiş qəzada 1 nəfər soydaşımız həyatını itirmişdi.
Bəs, Azərbaycan Dövlət Büdcəsindən milyonlarla dotasiya alan və buna baxmayaraq, hələ də özünü dolandıra bilməyən "Azərbaycan Dəmir Yolları” QSC niyə işini düzgün qura bilmir?
Son vaxtlar dəmir yolu xəttlərində tez-tez baş verən qəzalara səbəb nədir?
Məsələ ilə bağlı Demokrat.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov danışıb.
Onun sözlərinə görə, ümumiyyətlə, "Azərbaycan Dəmir Yolları” QSC bu sahəyə lazımı diqqət göstərə bilmir.
Vahid Əhmədov deyib ki, "Azərbaycan Dəmir Yolları” QSC dəmir yolu xəttlərində baş verən qəzaların qarşısının alınması ilə bağlı lazımı tədbirləri gücləndirməlidir:
"Bu cür xoşagəlməz hadisələr təkrar olunmamalıdır, çünki bu cür hadisələr iqtisadiyyatımıza kifayət qədər ziyan vurur və nəticədə sahibkarlar zərər çəkirlər. Baş vermiş son qəza ilə bağlı da düşünürəm ki, ola bilər texniki şöbə vaxtı-vaxtında yoxlamalar aparmayıb.
Ümumiyyətlə, dəmir yolu belədir ki, onu müntəzəm olaraq yoxlamaq lazımdır. Çünki havanın isti olması, temperaturun dəyişməsi dəmir yolu relslərinə öz təsirini göstərir. Dəmir yolunun bu sahədə çalışan ciddi inspeksiyası, işçiləri var. Yəqin ki, son vaxtlar ciddi yoxlamalar aparılmayıb, yaxud da yoxlamaları başa çatdırmayıblar ki, belə hadisələr baş verir. Bu artıq dünyada sübut olunmuş bir aksiomadır. Onsuz da havalar çox isti keçir. "Azərbaycan Dəmir Yolları” bunu nəzərə almalıdır. İstiləri nəzərə alaraq 2-3 gündən bir dəmir yollarında ciddi yoxlamalar aparmaq lazımdır. İndi insan itkisi olmasa da, müəyyən qədər sahibkarlara və mallara ziyan dəyib. Həm daha əvvəl Bakı–Tbilisi–Qars dəmir yolu xəttində, həm də indi Siyəzəndəki qəzalar onu göstərir ki, dəmir yolları sahəsində ciddi yoxlamalara ehtiyac var”.
