Millət vəkili Eldar Quliyevin biznesmen kürəkəni Abbas Səfərovun anası həbs edilə bilər.
AzNews.az xəbər verir ki, dövlət ittihamçısı Zəngilandan köçkün düşən bir ailəni məşkunlaşdığı evdən didərgin salan “Kapitol” tikinti şirkətinin direktoru Məhluqə Qibləliyevaya (əslində şirkətin sahibi Abbas Səfərovdur, lakin bu və ya digər məhkəmə proseslərində ona irəli sürülən ittihamlardan qaçmaq üçün şirkəti anasının adına keçirib – red.) 3 il 6 ay iş istəyib.
Məcburi köçkünlə sözügedən şirkətin növbəti məhkəməsi 24 noyabr 2015-ci il tarixində baş tutacaq. İşə Nəsimi rayon məhkəməsində hakim Elman İsayev baxacaq. Köçkün ailə bununla bağlı Məhkəmə-Hüquq Şurasının sədri Fikrət Məmmədova müraciət ünvanlayıb. Ailə hakim İsayevin ədalətli hökm çıxarması üçün F.Məmmədovun işə şəxsən nəzarət etməsini xahiş edib.
Qeyd edək ki, “Kapitol” şirkəti ilə köçkün ailə arasındakı dava 10 il əvvəldən başlayıb. Belə ki, Bakının mərkəzində göydələnlər ucaldan “Kapitol” tikinti şirkəti müxtəlif qanunsuzluqlar edərək Zəngilandan məcburi köçkün olan ailəni 10 ildən artıqdır ki, küçələrə salıb. “Kapitol” şirkətinin rəhbəri Abbas Səfərov ailənin məskunlaşdığı yurd- yuvanı yerlə yeksan edib. Şirkət dəfələrlə məhkəmələrin ailənin xeyrinə çıxardığı qərarları yerinə yetirməyib.
Onu da bildirək ki, A.Səfərov millət vəkili, iqtisad üzrə fəlsəfə doktoru, professor, Azərbaycan Kooperasiya Universitetinin rektoru Eldar Quliyevin qızının həyat yoldaşıdır.
