Aprelin 18-də daxili işlər nazirinin müavini, polis general-leytenantı Oruc Zalov «Eurovision» Mahnı Müsabiqəsi ərəfəsində Azərbaycan paytaxtında ictimai təhlükəsizliyin təmini ilə bağlı görülmüş işlərlə tanış olmaq üçün Bakıya gəlmiş Avstriyanın Daxili İşlər Nazirliyinin və Vyana polisinin nümayəndələri ilə görüşüb.
Daxili İşlər Nazirliyinin mətbuat xidmətindən AZXEBER.COM-a verilən məlumata görə, O.Zalov müsabiqə iləəlaqədar hazırlıq işlərinin vəziyyəti barədə danışıb və bunun dövlət başçısının şəxsi nəzarətində olduğunu vurğulayıb. Diqqətə çatdırılıb ki, beynəlxalq tədbirin təşkilində Daxili İşlər Nazirliyinin də üzərinə mühüm vəzifələr düşür və bu istiqamətdə xüsusi Tədbirlər Planı hazırlanaraq icra edilməkdədir. Polisin qarşısında duran əsas vəzifə isə müsabiqəərəfəsində və dövründə paytaxtda ictimai asayişin vəəmin-amanlığın nümunəvi qorunması, təhlükəsizlik baxımından digər analoji tədbirlər kimi bu beynəlxalq yarışmanın da ən yüksək səviyyədə keçirilməsini təmin etməkdir ki, həmin məqsədlə nazirliyin rəhbərliyi bütün zəruri tədbirləri görür. Nazir müavini iki gün ərzində DİN-in Çevik Polis Alayında təşkil olunmuş təlimlərdə iştiraklarına və müsabiqə öncəsi xidməti fəaliyyətin səmərəliyinin daha da artırılması məqsədi ilə verdikləri təkliflər üçün qonaqlara minnətdarlığını bildirib. Avstriya Daxili İşlər Nazirliyinin idarə rəisi Aleksander Marakovits səfərlərinin məqsədinin Bakıda «Eurovision-2012» mahnı müsabiqəsi və genişmiqyaslı digər tədbirlər zamanı ictimai asayişin qorunması və təhlükəsizliyin təmini sahəsində polis əməkdaşları üçün təlimin keçirilməsi olduğunu diqqətə çatdırıb. Qonaq bu istiqamətdə DİN tərəfindən bütün zəruri təşkilati-praktik tədbirlərin görüldüyünü, həmin nüfuzlu yarışma öncəsi asayiş keşikçilərinin peşəkarlığının yüksək səviyyəyə çatdığını qeyd edib.
