İyunun 12-də Pirəkəşkül qəsəbəsində Füzuli rayon sakini Dəyanət Quliyevin idarə etdiyi "Howo" markalı və Bakı şəhər sakini Samir Rəhimovun idarə etdiyi "Toyota Land-Cruiser" markalı avtomaşınlar toqquşub.
AZXEBER.COM DİN-in saytına istinadən xəbər verir ki, nəticədə S. Rəhimov və sərnişinləri, Bakı şəhər sakinləri İsmayıl Quliyev, Aygün Səfərəliyeva və Günay Bünyatova hadisə yerində ölüb, xəsarət alan digər sərnişini, Bakı şəhər sakini Cavid Mustafayev isə xəstəxanaya yerləşdiriliblər. Elə həmin gün, saat 13.20 radələrində Sumqayıt şəhərində də qəza baş verib. Bakı şəhər sakini Həmzə Kərimovun idarə etdiyi "QAZel" markalı və Sumqayıt şəhər sakini Asif Məmmədovun idarə etdiyi "KamAZ" markalı avtomaşınlar toqquşub. Nəticədə xəsarət alan hər 2 sürücü və A. Məmmədovun sərnişinləri, Sumqayıt şəhər sakinləri Fərid Məmmədov və Vaqif Quliyev xəstəxanaya yerləşdiriliblər. F. Məmmədov orada ölüb. İyunun 12-də daha bir yol nəqliyyat hadisəsi Gədəbəy rayonunda baş verib. Zəhmət kənd sakini Rafiq Yusifovun idarə etdiyi "VAZ-2106" markalı və Dəyirmandağ kənd sakini Xaliq Musayevin idarə etdiyi "KamAZ" markalı avtomaşınlar toqquşub. Nəticədə xəsarət alan R. Yusifov və sərnişinləri- Bənzər Allahverdiyeva, Şəhriyar Orucov və Kənan Musalı xəstəxanaya yerləşdiriliblər. Hər üç qəza ilə bağlı araşdırma aparılır.
