Bakı Şəhər Dövlət Yol Polisi İdarəsi Bakının Yasamal rayonunda 8 hərbçinin xəsarət alması ilə nəticələnən yol qəzası ilə bağlı araşdırma aparıb.
Bunu İdarənin Yol Hərəkətinin Təhlükəsizliyinin Təbliği və İctimai qurumlarla Əlaqə bölməsinin rəisi, polis polkovnik-leytenantı Vaqif Əsədov verib. Onun sözlərinə görə, hadisə şahidlərinin qəzaya uğrayan "Mercedes" markalı avtomobilin yol polisi əməkdaşları tərəfindən təqib edilməsi ilə bağlı iddiaların da həqiqətə uyğun olub-olmadığı yoxlanılıb.
Vaqif Əsədov deyib ki, Bakının 400 nöqtəsində 2000 müşahidə kamerası var və onlar vasitəsilə hərəkətə tam nəzarət edilir.Hərbi maşının qəzaya uğraması ilə bağlı KİV-də gedən məlumatlardan sonra dərhal xidməti araşdırmalara başlanılıb, dislokasiya üzrə ərazidə xidmət aparan yol polisi əməkdaşlarının izahatları alınıb. O, cümlədən, ərazidəki müşahidə kameralarındakı görüntülər də izlənib. Məlum olub ki, "Mercedes" DYP əməkdaşları tərəfindən qovulmayıb. Əksinə, avtomobilin sürücüsü sərxoş olub və yolda DYP avtomobilini gördükdən sonra saxlanılacağından ehtiyatlanıb və sürəti artırıb. Nəticədə ağır yol-nəqliyyat hadisəsi baş verib. Hazırda Yasamal Rayon Polis İdarəsində faktla bağlı araşdırma aparılır.
Vaqif Əsədov hüquqşünasların DYP əməkdaşlarının yol hərəkəti qaydasını pozan avtomobilləri təqib etməsinin yolverilməz olması ilə bağlı iddialarına da münasibət bildirib. Onun sözlərinə görə, ətrafdakıların həyatı üçün real təhlükə yaradan yüksək sürətlə hərəkət edən, yol hərəkəti qaydalarını dəfələrlə kobud şəkildə pozan avtomobillər yol polisi əməkdaşları tərəfindən razılaşdırılmış şəkildə təqib edilə bilər.
Qeyd edək ki, ötən gün baş verədə qəzadə 8 hərbçi yaralanmışdı. Hadisə şahidlərin iddialarına görə, hərbçilərin olduğu "UAZ"ın aşmasına səbəb qaydanı pozan “Mercedes”in yol polisi tərəfindən təqib edilməsi olub.
