Ləğv edilmiş Milli Təhlükəsizlik Nazirliyinin hazırda həbsdə olan generallarının cinayət əməllərinin araşdırılması zamanı yeni xüsusatlar ortaya çıxıb. Monitorinq Mərkəzinin sabiq rəisi, general Teymur Quliyev, onun əməkdaşları Fərhad Atayev və Eşqin Əliyevin cinayət işi üzrə araşdırmalar zamanı ipin bir ucu da nazirliyin digər idarəsi, Əks Kəşfiyyat Baş İdarəsinə gedib çıxıb.
Rusiyadan Azərbaycana məhsul gətirib satışını təşkil edən sahibkarlar - Zaur Cəbrayılov, Xəqani Ağamalıyev, Raqib Şıxəliyev və Sənan Əliyev də bu qurumun qurbanına çevrilib.
Belə ki, 2015-ci il noyabr ayında Z.Cəbrayılov kirayə götürdüyü yük maşını ilə digər üç şəxsin mallarını Rusiyadan Bakıya gətirib. Maşında saç boyası, həşəratları məhv edən vasitələr və şampunlar olub. Onlar "Qaradağ postu" yaxınlığında Teymur adlı MTN əməkdaşı tərəfindən saxlanılaraq nazirliyə gətiriliblər. Orada isə onlara "mallarınızı gömrükdən qanunsuz keçirdiyinizə dair sənəd düzəldə bilərik", "elə hesab edin ki, bu reys mal vurmamısız" kimi ifadələrlə hədə-qorxu gəlinərək külli miqdarda pul tələb olunub. Həmçinin, Z.Cəbrayılovun sürücüsü Şəmsi Yusupovdan onun əleyhinə ifadə alınıb və Ş.Yusupov Z.Cəbrayılovun Rusiyada ermənilərdən mal aldığını etiraf edib.
Z.Cəbrayılov ifadəsində bildirib ki, MTN zabitlərinin hədə-qorxularından çəkindiyi üçün onların istədiyi kimi, yəni adıçəkilən 3 sahibkar üçün saxta "Calgon" gətirməsi məzmununda izahat yazıb. Bir qədər sonra isə polkovnik və polkovnik-leytenant rütbəli şöbə rəisi, 55 yaşlarında, rus dilli, sarışın və əslən şuşalı olan şəxs Z.Cəbrayılovdan buraxılması üçün 50 min dollar tələb edib, 20 minə razılaşıblar. Z.Cəbrayılov həmin pulu verdikdən sonra onu sərbəst buraxıblar. MTN zabitləri eyni qayda ilə X.Ağamalıyevdən 20 min dollar, S.Əliyevdəın 2500 dollar, R.Şıxəliyevdən 1500 dollar pul alıblar.
MTN-in Əks-kəşfiyyat Baş İdarəsinin şöbə rəisinin müavini Teymur Həsənov istintaqa cəlb olunaraq dindirilib. O, ifadə verərək bildirib ki, Z.Cəbrayılovun Rusiyada saxta "Calgon" yuyucu tozlarını Vazgen adlı ermənidən alaraq ölkəyə gətirib sahibkarlara paylanması barədə əməliyyat məlumatı daxil olub: "Zaur Cəbrayılovun telefon nömrəsinin dinlənilməsini isə sabiq nazir Eldar Mahmudov göstərişi ilə həyata keçirildi. Dinləmə zamanı siqnal məlumatı öz təsdiqini tapdı. Nazirin tapşırığı ilə həmin şəxslər saxlanıldı. Onlar izahatlarında malları ermənilərdən aldıqlarını etiraf etdilər. Sonra isə bir daha bu işlə məşğul olmayacaqlarını dedilər. Mən idarə rəisi Fuad Sədrəddinova məruzə etdim, həmin şəxslərin maşınında "Calgon" olmadığı üçün rəhbərliyin tapşırığı ilə sərbəst buraxıldılar".
Şöbə rəisi Eldar Vəliyev isə baş verənlərdən məlumatsız olduğunu, onu öz şöbəsində keçirilən əməliyyatlardan kənarda tutduqlarını, əməliyyat tədbirlərinə onun müavini Teymur Həsənovun rəhbərlik etdiyini deyib.
Gömrük Komitəsindən daxil olan məktubda mübahisə predmeti olan malların qanunauyğun olaraq ölkəyə gətirildiyini qeyd olunub.
Bu əməliyyatla bağlı Dövlət Təhlükəsizlik Xidmətindən daxil olan məktubda qeyd olunub ki, Z.Cəbrayılov əvvəllər Sumqayıtda yaşayan, indi isə Rusiyada olan Vazgen adlı ermənidən onun kustar üsulla hazırladığı baytarlıq dərmanlarını alıb "Sovetski"dəki öz aptekində satırmış. Bildirilib ki, həmin şəxslər bir daha belə hərəkət etməyəcəklərinə söz verdiklərini üçün sərbəst buraxılıblar.
Həmçinin, Z.Cəbrayılovun dinlənilməsini MTN-in Əks Kəşfiyyat Baş İdarəsinin rəisi, general-mayor Ədalət Əsədullayev tərəfindən təsdiqlənib və hazırda həbsdə olan Monitorinq Mərkəzinin sabiq rəisi Teymur Quliyev, Eşqin Əliyev, Fərhad Atayev tərəfindən icra olunub.
İstintaq bütün sübutlar toplandıqdan sonra belə qərara gəlib ki, Z.Cəbrayılov, X.Ağamalıyev, R.Şıxəliyev və S.Əliyevin saxlanılaraq MTN-ə gətirilmələri və onlardan pul alınması xüsusatı üzrə araşdırmalar Teymur Həsənov və dəstənin digər üzvləri barəsində davam etdirilən cinayət təqibinin gedişində aparılması məqsədəmüvafiqdir.
Bununla da, bu günə kimi ictimaiyyətə bəlli olmayan yeni bir məlumat ortaya çıxır. MTN-nin Əks Kəşfiyyat Baş İdarəsinin vəzifəli şəxsləri barəsində də cinayət işi başlanılıb. Lakin, T.Həsənovdan başqa bu məxfi qurumdan daha kimlərin cinayət məsuliyyətinə cəlb edildiyi bəlli deyil.
