Eldar Qasımov: 'Bu cür mahnılar məni çox yaxşı xarakterizə edir' - VİDEO
MƏDƏNİYYƏT
22:26 31.01.2012
2640
“Yeni mahnım bir qayıdışdır...Dostlarımın yanına qayıdıram! Yeni mahnımda həm pərəstişkarlarımdan, həm mənim özümdən, həm də artıq ömrümüzün ayrılmaz bir hissəsinə çevrilən, əziyyətli, eyni zamanda xoş təəsüratlı ötən bir ildən bəhs olunur. Lirik mahnılar, böyük kütləyə, auditoriyaya və dinləyicilərə ruhumu və ürəyimi göstərir. Mən insanların ürəyinə birbaşa yol tapan, mənası hər kəsə tanış olan və həyatın reallıqlarından bəhs edən mahnıları ifa etməyə üstünlük verirəm. Mən onları “Sevgi melodiyaları” adlandırıram. Bu cür mahnılar məni çox yaxşı xarakterizə edir”. Bu fikirlər “Birlikdə nəhayət” adlanan yeni mahnısını təqdim edən, Eurovision 2011-in qaliblərindən Eldar Qasımova məxsusdur.Eldar Qasımov eurovision.az saytına sevgiylə bağlı fikirlərini də bölüşüb: “Təəssüf ki, son vaxtlar insanların əsl sevgiyə və möcüzələrə daha az inandığını görürəm. Halbuki bu iki məfhum buxarlanmayıb, heç bir yerə itməyib, onlar həmişə bizim yanımızdadır. İnsanlar hər gün öz problemləri ilə bu iki gözəl hissi dəfn edir. Onlar qəddar həyat qarşısında hissiz və duyğusuz görünməyə çalışırlar. Ancaq biz hamımız olduqca səmimi olmağa çalışmalıyıq, möcüzələrə və məhəbbətə inanmalıyıq, onları özümüzə cəlb etməliyik. Bəzi insanlarda bu alınır! Bizdə də mütləq alınacaq! Mən buna inanıram!”
