Xəbər verdiyimiz kimi, Avropa İttifaqı Rusiyanın Ermənistanın kənd təsərrüfatı məhsullarının idxalına tətbiq etdiyi məhdudiyyətlər fonunda bu ölkəyə 50 milyon avrodan çox təcili yardım paketi hazırlayır.
Bu barədə Avropa Komissiyasının sədri Ursula fon der Lyayen Ermənistanın Baş naziri Nikol Paşinyanla telefon danışığından sonra məlumat verib.
Mövzu ilə bağlı AZXEBER.COM-a danışan politoloq Tofiq Abbasov bildirib ki, Ermənistan ətrafında seçki prosesi ilə bağlı yaranan ajiotaj həddindən artıq şişirdilir.
Onun sözlərinə görə, Nikol Paşinyan müəyyən mənada Moskvanın dəstəklədiyi siyasətçidir və Rusiya onun partiyasına latent şəkildə dəstək verir:
"Əgər hər hansı terror aktı və ya çevriliş cəhdi baş verməsə, ciddi dəyişiklik gözlənilmir. Nikol Paşinyan seçkilərdə qələbə qazanacaq və Rusiya ilə münasibətlərini qoruyub saxlayacaq. Bununla yanaşı, Ermənistan Avropa İttifaqı ilə inteqrasiya istiqamətində müəyyən addımlar atacaq. Lakin bunun böyük əhəmiyyət daşıdığını düşünmürəm. Avropa İttifaqının belə problemli ölkəyə xüsusi ehtiyacı yoxdur. Ermənistan bir sıra daxili və xarici problemlərlə üzləşən dövlətdir. Bu ölkənin üzərinə əlavə məsuliyyət götürmək Aİ üçün cəlbedici görünmür”.
Ekspert qeyd edib ki, Ermənistan həm Avropa İttifaqı, həm də ABŞ üçün geosiyasi baxımdan müəyyən əhəmiyyət daşıyır:
"Ölkənin İran, Türkiyə və ümumilikdə Cənubi Qafqaz regionu ilə bağlı mövqeyi Qərbin maraq dairəsindədir. Regiondakı bir sıra hədəflər məhz Ermənistan üzərindən həyata keçirilməyə çalışılır. Bu ərazi Avrasiya məkanında və Mərkəzi Asiyaya çıxış baxımından müəyyən strateji əhəmiyyətə malikdir. Təbii ki, burada aparıcı rolu Azərbaycan oynayır.
Avropa İttifaqı bunu açıq şəkildə etiraf etməsə də, Azərbaycanın yaratdığı yeni reallıqlar fonunda Ermənistanın da sosial-iqtisadi baxımdan yeni mərhələyə qədəm qoyacağı gözlənilir. Azərbaycan regionda nəqliyyat, kommunikasiya və enerji layihələri ilə əlverişli şərait formalaşdırıb və bu layihələr ətraf ölkələr üçün də faydalıdır.
Ermənistan isə uzun illər Azərbaycana qarşı ərazi iddiaları irəli sürməklə özünü çıxılmaz vəziyyətə salıb. Paşinyan artıq əvvəlki siyasi kursun ölkə üçün faydalı olmadığını görür və daha realist yanaşmanın vacibliyini vurğulayır”.
Politoloq hesab edir ki, Avropa İttifaqının Ermənistana dəstək göstərməsi təbii haldır:
"Erməni lobbiləri Avropanın siyasi dairələrində kifayət qədər fəaldır və Ermənistanın daim diqqət mərkəzində qalmasına çalışırlar. Onlar ölkənin çətin geosiyasi mühitdə yerləşdiyini və qonşuları ilə münasibətlərinin mürəkkəb olduğunu ön plana çıxarırlar. Lakin regiondakı bir çox problemlərin yaranma səbəbləri və erməni tərəfinin bu proseslərdəki rolu çox vaxt arxa plana keçirilir.
Bəzi dairələr Ermənistanı bölgədə qarşıdurma və gərginliyin davam etməsi üçün istifadə olunan vasitə kimi görür. Müəyyən dövrlərdə bu siyasət nəticə versə də, hazırda erməni lobbiləri yenidən Ermənistanın çətin vəziyyətdə olduğunu göstərməyə çalışırlar. Onlar iddia edirlər ki, Rusiya Ermənistanı iqtisadi təzyiq altında saxlayır və ixrac imkanlarını məhdudlaşdırır. Lakin vəziyyət tam olaraq belə deyil.
Ermənistanın hələ də müəyyən iqtisadi ehtiyatları mövcuddur. Digər tərəfdən, ölkə iqtisadi baxımdan Rusiyadan ciddi şəkildə asılıdır. Rusiya sanksiyalar altında olsa da, Ermənistan vasitəsilə bir sıra məhsul və texnologiyaların ölkəyə daxil olması davam edir. Ermənistan müxtəlif texniki avadanlıqların, komponentlərin və digər malların Rusiyaya çatdırılmasında mühüm tranzit rolunu oynayır.
Ona görə də burada sensasion vəziyyət görmürəm”.
Şahanə
