Elmar Məmmədyarov Britaniya, Gürcüstan və Litvanın XİN rəhbərləri ilə görüşdü

Bütün Xəbərlər

12:29 07.12.2011

1257

Xarici İşlər Naziri Elmar Məmmədyarov dekabrın 6-da Litvanın paytaxtı Vilnüs şəhərində Avropada Təhlükəsizlik və Əməkdaşlıq Təşkilatının Nazirlər Şurasının 18-ci iclasında iştirakı çərçivəsində bir sıra ikitərəfli görüşlər keçirib. Xarici İşlər Nazirliyinin mətbuat xidmətindən AZXEBER.COM-a verilən məlumata görə, Böyük Britaniyanın xarici işlər naziri Uilyam Heyqlə keçirilmiş görüşdə ikitərəfli münasibətlərin hazırkı vəziyyəti və gələcək perspektivləri ətrafında fikir mübadiləsi aparılıb. Görüş zamanı iki ölkə arasında iqtisadi və enerji sahələrində, həmçinin beynəlxalq təşkilatlar və BMT TŞ çərçivəsində perspektiv əməkdaşlıq məsələləri müzakirə olunub. Britaniya tərəfi Azərbaycan Respublikası ilə Türkiyə Cümhuriyyəti arasında qaz alqı-satqısı və tranziti məsələlərinə dair sənədlər paketinin imzalanmasından məmnunluq bildirib.Gürcüstanın xarici işlər naziri Qriqol Vaşadze ilə görüşən nazir E.Məmmədyarov həmkarı ilə Azərbaycan və Gürcüstan arasındakı ikitərəfli əlaqələr və regionda mövcud olan münaqişələrin həlli perspektivlərini müzakirə edib. Görüşdə həmçinin beynəlxalq təşkilatlar və GUAM çərçivəsində əməkdaşlıq, eyni zamanda enerji sahəsində əməkdaşlıq məsələləri müzakirə edilib.Daha sonra E.Məmmədyarov Litvanın xarici işlər naziri Audronius Ajubalislə görüşüb. Litva tərəfi ATƏT-in Minsk qrupunun həmsədrlərinin, Azərbaycan və Ermənistan xarici işlər nazirlərinin Dağlıq Qarabağ münaqişəsinə dair bəyanatını yüksək qiymətləndirib. Görüşdə iki ölkə arasında enerji sahəsində əməkdaşlıq, eyni zamanda, BMT çərçivəsində əməkdaşlıq məsələləri müzakirə edilib. Görüşün sonunda Azərbaycan hökuməti ilə Litva hökuməti arasında diplomatik pasporta malik şəxslərin viza tələbindən azad edilməsi haqqında saziş imzalanıb.