Əmanətlərin Sığortalanması Fondu kompensasiyaların "AniPay" üzərindən ödənilməsini planlaşdırır.
AZXEBER.COM xəbər verir ki, bunu Əmanətlərin Sığortalanması Fondunun Hüquq departamentinin direktoru Azər Əmirov Milli Mətbuat Günü ilə bağlı təşkil edilmiş Dialoq və Əməkdaşlıq Forumunda deyib.
Onun sözlərinə görə, gələcəkdə daha mütərəqqi mexanizmlərə keçid mümkündür və bu istiqamətdə araşdırmalar aparılır: "Artıq elektron ödəniş sistemləri formalaşmaqdadır. Məsələn, "AniPay" platformasına qoşulmağı planlaşdırırıq. Bu halda kompensasiyaların real vaxt rejimində birbaşa vətəndaşların hesabına köçürülməsi mümkün olacaq. Hazırda bu kimi ödəniş sistemləri ilə inteqrasiya məsələləri gündəmdədir. Mövcud rəqəmsallaşma, süni intellekt texnologiyaları və elektron xidmətlər bir çox hallarda qanunvericilik təşəbbüslərini qabaqlayır. Bu isə yeni sistemlərlə inteqrasiya prosesində müəyyən çətinliklər yaradır. Bununla belə, elektron ödəniş sistemləri vasitəsilə kompensasiyaların ödənilməsi istiqamətində işlər davam etdirilir".
A.Əmirov bildirib ki, hazırda "Azərpoçt", "MilliÖN" və digər ödəniş sistemləri vasitəsilə vətəndaşlar FİN kodunu daxil etməklə ödənişlərini həyata keçirə bilirlər: "Bankın ləğvi prosesində isə sistemlərin inteqrasiyası ilə bağlı müəyyən problemlər ortaya çıxır. Bəzi hallarda eyni şəxsə bir neçə hesab identifikasiya kodunun verildiyi aşkarlanır ki, bu da əvvəlki illərdən qalan problemlərlə bağlıdır. Son dövrlərdə belə halların sayı xeyli azalıb. Bununla belə, sistemlərin tam şəffaf vəziyyətə gətirilməsi və ödənişlərin qəbulunun bərpası müəyyən vaxt tələb edir. Adətən, ilk 2-3 gün ərzində müraciət edən şəxslərin ödənişlərini qəbul etməkdə çətinlik yarana bilər. Əvvəllər isə bu müddət xeyli uzun olurdu. Müştərilərə 3-6 ay sonra yenidən müraciət etmələri tövsiyə edilirdi. Bu müddətdə gecikmə günləri və faizlər hesablandığından həm borclular, həm də ləğvedici qismində Fond üçün əlavə iş yükü yaranırdı və sonradan çoxsaylı düzəlişlər aparılmalı olurdu".
O qeyd edib ki, "Muğanbank"ın ləğvi zamanı isə artıq üçüncü gündən bütün ödəniş sistemlərinin fəaliyyəti tam bərpa edildi və ödənişlərin qəbulu təmin olunub.
