Qarabağ Azadlıq Təşkilatının fəalları dünən bir neçə saat Bakı aeroportunda Ermənistanın milli təhlükəsizlik nazirinin müavini Romik Arutyunyanın rəhbərlik etdiyi erməni nümayəndə heyətini “izləyib”.
“Müxtəlif ölkələrdən bir neçə nümayəndə heyətlərinin gəlişini qeydə aldıq, lakin onların arasında ermənilər yox idi. Görünür, hakimiyyətimiz erməniləri başqa yolla gətirib”, deyə QAT rəhbəri Akif Nağı Turan agentliyinə bildirib. Erməniləri gördükləri zaman nə etməyi düşündükləri barədə suala cavabda Nağı etiraf edib ki, “ermənilərə fiziki təzyiq göstəriləcəkdi”.
Xatırladaq ki, söhbət MDB ölkələrinin təhlükəsizlik xidmətlərinin nümayəndə heyətlərinin terrorizmə və mütəşəkkil cinayətkarlığa qarşı mübarizə məsələlərinə həsr olunmuş iclasda iştirak etmək üçün Bakıya səfərlərindən gedir. Bakı Ermənistanın xüsusi xidmət orqanlarının nümayəndələrini də qəbul etməyə hazır olduğunu bildirmişdi ki, bu da bir sıra ictimai təşkilatların, o cümlədən QAT-ın narazılığına səbəb olmuşdu.
Bu gün iclasın işinin ilk günündə Akif Nağı Bakı Polis İdarəsinə çağırılıb. Burada 2,5 saat (saat 18.00-a qədər) polis rəisinin müavini Elxan Həsənov onunla söhbət edib.
“O, məni inandırırdı ki, bizim əməllərimiz qanunsuzdur. Tədbir dövlət səviyyəsində keçirilir, buna görə onun keçirilməsinə mane olmaq yolverilməzdir. Sonda mənə ictimai asayişi pozmağın yolverilməz olduğu haqqında rəsmi xəbərdarlıq edildi”, deyən Nağı Azərbaycana qarşı terror aktları təşkil edən və həyata keçirənləri ölkəyə buraxmağa razılaşan hakimiyyətin siyasətini rüsvayçı adlandırıb. (contact.az
