Məlum olduğu kimi, Ermənistan son günlər yenidən sülhün bərqərar olmasına maneçilik yaradır.
Tez-tez atəşkəsi pozur və sülhə zidd hərəkətlər edir.
Ötən həftə ard-arda Naxçıvan və Kəlbəcər istiqamətində Azərbaycan Ordusunun bölmələri Ermənistan Silahlı qüvvələrinin atəşinə məruz qalıb.
Lakin hər zaman olduğu kimi düşmən cavab atəşi və xüsusi hərbi əməliyyatlar nəticəsində susdurulub.
Ortaya isə bir sual çıxır ki, "Böyük Ermənistan" xülyasıyla yaşayan Ermənistan hökuməti və onlara hamilik edən qüvvələr nə düşünür?
Bu cür təxribatlar fonunda sülh müqaviləsini imzalamaq çox təhlükəli və qeyri-mümkün görünür.
Ermənistan bu dəfə kimə güvənərək belə çirkin addımlar atır, yeni müharibə istəyir?
Məsələ ilə bağlı AZXEBER.COM-a siyasi şərhçi Tural İsmayılov açıqlama verib.
Politoloq saytımıza açıqlamasında bildirib ki, Ermənistan hər dəfə Azərbaycanın sülhlə bağlı təklif və mövqelərinə məhəl qoymur:
"Əslində, biz görürük ki, Ermənistan Azərbaycanın sülhlə bağlı dəqiq, ardıcıl və prinsipial mövqelərinə, təkliflərinə, o cümlədən sülhpərvər çağırışlarımıza məhəl qoymamağa çalışır. Son dövrlər Fransanın Ermənistanı silahlandırması və Qərbin müəyyən dairələrinin Ermənistana ciddi dəstək nümayiş etdirməsi bu ölkənin qızışmasına və nəticədə sülh prosesindən yayınmasına səbəb olur. Bu və baş verən digər hadisələr göstərir ki, Ermənistanın son zamanlar etdiyi təxribatlar da məhz Azərbaycanla sülh müqaviləsini imzalamaqdan yayınmağa hesablanıb. Əlbəttə ki, bütün bunlar qəsdən baş verir. Ermənistan cəbhə bölgəsində vəziyyəti gərginləşdirərək dünyaya belə bir mesaj verməyə çalışacaq ki, Azərbaycanla sülh mümkün deyil".
T. İsmayılov qeyd edib ki, Avropa İttifaqı Cənubi Qafqazdakı missiyası indiyədək Ermənistanın təxribatlarına heç bir reaksiya verməyib:
"Ermənistan bölgənin daim xaotik olması ilə əlaqədar mesaj yaratmağa çalışır və bu Qafqaz regionunu təhlükəsiz bir ərazi kimi təqdim etmək istəyir. Özəlliklə Azərbaycanın və bölgənin ciddi və böyük güclərinin Zəngəzur dəhliziylə bağlı Ermənistana ardıcıl çağırışlar etməsi fonunda Ermənistanın son olaraq Naxçıvan və Kəlbəcərdə istiqamətində təxribatlar törətməsi onu göstərir ki, Ermənistanın güvəndiyi qüvvələr bu ölkəni sülhə yaxınlaşmağa təhrik etmir. Ümumən, Avropa İttifaqının Mülki Müşahidə missiyası adı altında Ermənistan ərazilərindəki casus şəbəkəsi də vəziyyətə ciddi formada nəzarət edə bilmir. Bu günə qədər Avropa İttifaqının missiyası Ermənistanın həyata keçirdiyi bu təxribatlara reaksiya verməyib. Digər tərəfdən, Rusiya lideri Putinin Azərbaycana səfəri ərəfəsində Ermənistanın bu tip provokasiyalar törətməsi onu göstərir ki, Ermənistan konkret olaraq Sorosçu hakimiyyət vasitəsilə Qərbin imperialist dairələrinin peşkəşinə çevrilib. Bütövlükdə, sülhlə bağlı çağırışlar fonunda Ermənistanın COP-29-a dəvət edilməsi və yenidən təxribat törətməsi bu ölkə vasitəsilə oynamaq istəyən təhlükəli gücləri göstərir".
Mikayıl Mirzəzadə
Yazı Medianın İnkişafı Agentliyinin "Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlar əməkdaşlığının inkişaf etdirilməsi" mövzusunda dərc edilib.
