İyunun 7-də keçirilən parlament seçkilərinin nəticələrinə əsasən yeni Nazirlər Kabinetinin formalaşdırılması ilə əlaqədar Ermənistan hökuməti avqustun 2-də istefa verəcək. Bu barədə Ermənistanın Baş naziri Nikol Paşinyan hökumətin bugünkü iclasında məlumat verib.
Baş nazir xatırladıb ki, parlamentin yeni tərkibdə ilk iclasının keçirildiyi gün mövcud hökumət istefa verir. Onun sözlərinə görə, bundan sonra Ermənistan Prezidenti parlamentdə çoxluğa malik siyasi qüvvənin namizədini baş nazir vəzifəsinə təyin edəcək.
Qeyd edək ki, iyunun 7-də keçirilən parlament seçkilərində Paşinyanın rəhbərlik etdiyi hakim "Vətəndaş müqaviləsi” Partiyası qalib gəlib və yeni hökuməti müstəqil şəkildə formalaşdırmaq hüququ əldə edib.
Tanınmış erməni bloger və jurnalist Natali Aleksanyan AZXEBER.COM-a açıqlamasında deyib ki, bunun əsas məqsədi seçkilərin nəticələrinə uyğun olaraq yeni hökumətin formalaşdırılmasını təmin etməkdir:
"Hökumətin parlament seçkilərindən sonra istefa verməsi ilk növbədə hüquqi və konstitusion prosedurdur. Bunun əsas məqsədi seçkilərin nəticələrinə uyğun olaraq yeni hökumətin formalaşdırılmasını təmin etməkdir. Referendum məsələsinə gəlincə, bildiyim qədərilə hökumətin istefası özlüyündə referendumun keçiriləcəyi anlamına gəlmir. Gələcəkdə bu istiqamətdə hər hansı qərar qəbul olunarsa, bu barədə Ermənistan Respublikasının Konstitusiyasına və qüvvədə olan qanunvericiliyə uyğun şəkildə rəsmi məlumat veriləcək”.
"Hesab edirəm ki, ən vacib məqam hər bir ölkənin konstitusion proseslərinə hörmətlə yanaşmaq, eləcə də regionumuzda sülhün, sabitliyin və qarşılıqlı etimadın möhkəmləndirilməsi naminə konstruktiv dialoqun davam etdirilməsidir”,- deyə jurnalist qeyd edib.
Şahanə Ziyad
