Xəbər verdiyimiz kimi, Ermənistan Konstitusiyasını dəyişməyə hazırlaşır.
Ermənistanın yeni Konstitusiya layihəsinin mətninin bazar ertəsi ictimaiyyətə açıqlanacağı gözlənilir. Baş nazir Nikol Paşinyan da həmin gün məsələ ilə bağlı xalqa müraciət edəcək.
Konstitusiya dəyişikliyi təşəbbüsü Ermənistanın siyasi və hüquqi sistemində gözlənilən yeniliklərlə yanaşı, Azərbaycan-Ermənistan münasibətləri və sülh prosesi baxımından da diqqət çəkir.
Bəs bir ölkənin Konstitusiyasının dəyişdirilməsi nə deməkdir və bu addım dövlətin gələcək siyasi kursuna necə təsir göstərə bilər?
Mövzu ilə bağlı AZXEBER.COM-a danışan politoloq Taleh Əliyev bildirib ki, Ermənistanda Konstitusiya dəyişikliyinin əsas səbəblərindən biri Azərbaycanın sülh sazişinin imzalanması ilə bağlı prinsipial mövqeyidir:
"Ermənistanda Konstitusiya dəyişikliyi iki mühüm səbəbdən irəli gəlir. Birincisi, Azərbaycan tərəfinin sülh sazişinin imzalanması ilə bağlı prinsipial və qəti mövqeyidir. Məhz bu mövqe Ermənistan Konstitusiyasının hazırkı mərhələdə dəyişdirilməsini zəruri edən əsas amillərdən biridir.
İkinci səbəb isə heç şübhəsiz ki, Ermənistanın Baş naziri Nikol Paşinyanın ölkəsinin başqa dövlətlərin, xüsusilə də Rusiyanın təsirindən xilas olması istəyidir. Paşinyan hesab edir ki, istər hazırkı Konstitusiya, istərsə də onun hakimiyyətə gəlişindən əvvəlki dövrdə mövcud olmuş ictimai-siyasi sistem Ermənistanın xarici qüvvələrin təsiri altında qalmasının əsas səbəblərindən biridir. O, Rusiyanın maraqlarının ölkədə reallaşmasında Konstitusiyanın da rolunu görür".
Politoloqun sözlərinə görə, Ermənistanın yeni Konstitusiya qəbul etməsi ölkənin siyasi və ideoloji istiqamətində ciddi dəyişikliklərə yol aça bilər:
"Ona görə də Ermənistanın hazırkı Konstitusiyadan imtina etməsi, xüsusilə də tarixi və saxta «dənizdən-dənizə Böyük Ermənistan» ideologiyasının daşıyıcısı olan hüquqi müddəalardan uzaqlaşaraq yeni Konstitusiyanın hüquqi əsaslarını yaratmağa çalışması bu ölkə üçün, mən deyərdim ki, gerçəkdən inqilabi hadisə və ciddi dəyişiklik olacaq.
Yəqin ki, bu proses Rusiyanın Cənubi Qafqazdan uzunmüddətli perspektivdə sıxışdırılıb çıxarılmasının əsasını qoyacaq. Bununla da bölgədə, xüsusilə Azərbaycan və Türkiyə ilə uzunmüddətli sülhün və əməkdaşlığın hüquqi əsaslarının formalaşdırılması prosesi başlayacaq. Lakin bu, təkcə Ermənistanı əhatə edən məsələ deyil. Eyni zamanda Azərbaycanı və əlbəttə ki, Türkiyəni də maraqlandıran olduqca mühüm bir siyasi hadisədir".
Fəridə Əsədzadə










































