Son günlər Azərbaycan-Ermənistan dövlət sərhədində Ermənistan silahlı qüvvələrinin bölmələri tərəfindən Azərbaycan Ordusunun mövqeləri intensiv atəşə tutulur. Bu barədə Müdafiə Nazirliyindən məlumat verilib.
Bildirilib ki, son günlər Azərbaycan-Ermənistan dövlət sərhədində baş verən gərginliyə görə bütün məsuliyyət Ermənistanın hərbi-siyasi rəhbərliyinin üzərinə düşür.
Bəs, Ermənistan tərəfi bu cür təxribatlarla nəyə nail olmağa çalışır?
Millət vəkili Fəzail Ağamalı bu barədə AZXEBER.COM-a fikirlərini bildirib.
Deputat burada iki əsas səbəbin olduğunu qeyd edib:
"Burada iki əsas səbəb ola bilər. Birincisi, Rusiya ilə bağlı olan revanşist qüvvələrin təsir dairəsində fəaliyyət göstərən yüksək rütbəli hərbçilər ola bilər. Bu hərbçilər almış olduğu komandaya uyğun olaraq sərhəd boyunca bu cür təxribatlar törədirlər. Danışıqların gedişinə mənfi təsir göstərərək gərginlik yaradırlar.
İkinci səbəb isə o ola bilər ki, Paşinyan cəmiyyəti sülhə hazırlamaq üçün düşünülmüş şəkildə bu gərginliyi saxlayıb göstərməyə çalışır ki, əgər sülh danışıqları olmasa, sərhədlər dəqiqləşməsə, münasibətlər normallaşmasa, bu cür atışmalar müharibəyə gətirib çıxara bilər. Yəni cəmiyyəti müharibədən çəkindirmək, müharibə vasitəsilə qorxutmaq üçün düşünülmüş şəkildə bu cür addımlar atıla bilər. Nəticədə, cəmiyyət də Paşinyanın dediyi kimi, bu ilin sonuna qədər Azərbaycanla sülh müqaviləsinə hazır olsun”.
F.Ağamalı bildirib ki, bu təxribatların heç bir təsiri olmayacaq:
"Nəticə etibarilə, bunun təsiri olmayacaq. Çünki hazırda Rusiyanın mövqeyi getdikcə zəifləyir. Paşinyan bunun fərqindədir. Şübhəsiz ki, bu danışıqların moderatoru kimi çıxış edən Avropa İttifaqı vasitəsilə danışıqların aparılması Paşinyana əlavə güc verir. Aİ-nın bu danışıqlarına ABŞ-da çox müsbət yanaşır. Paşinyan həm də bu amilə görə, Azərbaycanla münasibətlərin normallaşmasında maraqlıdır”.
Deputat həmçinin vurğulayıb ki, hər bir təxribatın cavabı dəfələrlə artıq verilir:
"Ermənistanın hər bir təxribatına qarşı Azərbaycanın qəhrəman əsgər və zabitləri, silahlı qüvvələrimiz lazımi şəkildə cavab verib, bundan sonra da verəcək. Hər bir atəşə qarşı onlarla cavab atəşi, hər bir xəsarət almış əsgər və zabitlərimizə qarşı ondan 10 dəfə artıq onlara zərbə vurulacaq. Mən tam əminəm ki, bizim silahlı qüvvələrimiz yüksək hazırlıq səviyyəsindədir. Ermənilərə hər zaman olduğu kimi, indi də qətiyyətlə cavab verirlər. Bütün bunlar Müdafiə Nazirliyinin rəsmi açıqlamalarında da özünü göstərir.”
Aydın Nuri
