'Eurovision ölkələrində “Demokratiya naminə səs ver!” kampaniyasına başlamışıq'

“Demokratiya naminə musiqi” kampaniyasının koordinatoru Rəsul Cəfərov Amerikanın Səsi radiosuna müsahibəsində bildirib ki, ölkədə insan hüquqlarının, söz azadlığının ümumi durumu ilə bağlı hesabatlar hazırlanıb. “İctimai televiziyanın verilişlərinin Avropa Yayım Birliyinin standartlarına uyğunluğu ilə bağlı isə xüsusi monitorinq aparmışıq”, - deyə o qeyd edib.Cənab Cəfərovun fikrincə, ölkədə insan hüquqlarının durumu pisləşməkdə davam edir. “Beynəlxalq və yerli hüquq-müdafiə təşkilatlarının, eyni ilə də bizim davamlı mübarizəmizə baxmayaraq ölkədə heç də insan hüquqlarının durumunun yaxşılaşmasından danışa bilmərik. Çünki, vəziyyət olduğundan da bir qədər pisləşməyə doğru gedib”.Onun sözlərinə görə, kampaniya başlayandan indiyədək beynəlxalq mediada Azərbaycanda insan haqları ilə bağlı yüzdən çox məqalə dərs edilib. “Artıq, beynəlxalq ictimaiyyətin diqqəti ölkədə insan haqlarının gərgin durumuna yönəlib. Məsələn, Avropa Parlamentinin prezidenti, Avropa Şurasının rəhbərləri, beynəlxalq səviyyədə tanınmış musiqiçilər Azərbaycanda insan hüquqları ilə bağlı fikir bildirib. Ümid edirik ki, Bakıya gələcək tanınmış musiqiçilərdən də müəyyən mesajlar gələcək”.Cəfərov “Demokratiya naminə musiqi” kampaniyası çərçivəsində “Demokratiya naminə səs ver!” kampaniyasına start verildiyini deyib. “Biz Avropa vətəndaşlarına və xüsusilə də Eurovision fanatlarına müraciət edəcəyik ki, əgər xüsusi seçimləri yoxdursa demokratiya və insan haqları sahəsində problemləri olan ölkələrə səs versinlər. Belə olan halda “Demokratiya naminə musiqi” kampaniyasını həmin ölkələrdə davam etdirəcəyik. Bu ölkələr sırasında Azərbaycan, Belorus, Ukrayna var və digər ölkələri də siyahıya daxil edə bilərik. İstəyirik ki, festival çərçivəsində insan haqları ilə bağlı duruma yardım göstərilsin”.“Demokratiya naminə musiqi” kampaniyası çərçivəsində mayın 16-da Bakıda “İnsan haqlarının mövcud durumu və gələcək perspektivlər” mövzusunda beynəlxalq konfrans keçiriləcək. Mayın 19-da Bakıda insan haqlarına, demokratiyaya həsr olunmuş mahnılardan ibarət musiqili parti təşkil ediləcək. Mayın 21-də Azərbaycana gəlmiş xarici jurnalistlər üçün mətbuat konfransı təşkil ediləcək. Nəhayət, mayın 22-dən 26-dək, Eurovision mahnı müsabiqəsinin yarımfinallarından finalınadək olan dövrdə “İnsan haqlarına dəstək verin!”, “Demokratiyanı dəstəkləyin!”, “Demokratiya naminə oxuyun!”, “Vicdan məhbuslarına azadlıq!”, “Jurnalsitlərə azadlıq!”, “Söz azadlığına dəstək ol!” və başqa şüarlar yazılmış, habelə həbsdə olan vicdan məhbuslarının şəkilləri olan köynəklər geyinərək müxtəlif kampaniyalar təşkil ediləcək.