Musiqi prodüserliyi – musiqi əsərinin yaradılması, yazılması, işlənməsi və yayımlanması prosesində yaradıcı və texniki rəhbərliyi həyata keçirən peşə sahəsidir. Prodüser musiqi layihəsinin əsas kuratoru, bəzən də rejissoru kimi çıxış edir.
20 ildir musiqi prodüseri kimi fəaliyyət göstərən və bir çox uğurlu layihələrə imza atan Həsən Məmmədyarov AZXEBER.COM-un qonağı olub.
Həmsöhbətimiz olan peşəkar prodüser yeni layihələrindən danışıb:
- Qlobal musiqi bazarında Azərbaycan musiqisinin yerini necə qiymətləndirirsiniz?
- Azərbaycan musiqisinin qlobal bazarda potensialı olduqca böyükdür. Ölkəmizin zəngin musiqi irsi — xüsusilə muğam, xalq musiqisi və milli alətlərimizin özünəməxsus səsi — dünya musiqi palitrasında unikal bir rəngdir. Lakin bu potensialın tam reallaşması üçün həm sistemli dəstəyə, həm də müasir prodüserlik yanaşmasına ehtiyac var. Çünki Azərbaycan musiqisi qlobal bazarda yer almağa tam layiqdir. Məsələ bu dəyəri necə və kimlərlə dünyaya çıxarmaqda yatır. Bizim missiyamız da məhz bunu reallaşdırmaqdır.
- Sizcə, uğurlu prodüser olmaq üçün hansı keyfiyyətlər vacibdir?
- Uğurlu prodüser olmaq təkcə texniki biliklərə malik olmaqdan ibarət deyil. İlk növbədə, yaradıcı baxış vacibdir. Prodüser musiqiyə yalnız texniki tərəfdən deyil, həm də bədii və strateji prizmadan baxmağı bacarmalıdır. İkincisi, ünsiyyət və liderlik bacarıqları çox önəmlidir. Prodüser bir çox insanla — ifaçılar, səs mühəndisləri, aranjimançılar və menecerlərlə birgə işləyir. Bu prosesi uğurla idarə etmək üçün qərarvermə bacarığı gərəkdir.
- Gələcək üçün planlaşdırdığınız layihələr və əməkdaşlıqlar varmı?
- Bəli, hazırda mart ayında keçirilməsi planlaşdırılan Eyyub Yaqubovun konsertinin hazırlıqları ilə məşqulam. Çox böyük və peşəkar bir komanda ilə konsertin layihəsi üzərində işləyirik. İnşallah hər şey dəqiqləşəndən sonra ictimaiyyətə məlumat veriləcək.
Aysel Hacızadə
