Milli Dirçəliş Hərəkatı Partiyası sədrinin müavini Seymur Həsənlinin tutduğu vəzifədən istefa verdiyini xəbər vermişdik. “Facebook” profilində istefasını şəxsi problemləri ilə əlaqələndirsə də, araşdırmalarımız Fərəc Quliyevlə onun arasında maddi baxımdan narazılıq yarandığını göstərdi. Belə ki, Fərəc Quliyev partiya funksionerinə maddi baxımdan heç bir dəstək verməyib və Seymur Həsənli vəzifəsindən uzaqlaşıb.
Seymur Həsənli AZXEBER.COM-a verdiyi məlumatda yayılan xəbərlərə münasibət bildirib:
“Haqqımda mətbuatda yazılanlara səbrlə yanaşırdım. Amma dünən Millətçi Gənclər Birliyi adından yayılan informasiya və eyni informasiyanın başqa bir saytda Milli Dirçəliş Hərəkatı Partiyası gəncləri adından verilməsi, məni danışmağa vadar etdi. Partiyanın sədri Fərəc Quliyevə də bu haqda bildiriş göndərdim ki, aydınlıq gətirsin amma cavabsız qaldı sorğum. Öncə onu deyim ki, Millətçi Gənclər Birliyi adında təşkilat mövcud deyildir. Görünür informasiyanın mətbuatda ötürülməsində qeyri-peşəkarlıq nümayiş etdirilib.
O ki, qaldı yazılanlara, onlar heç bir o qədər də marağımda deyil. Məlumatda qeyd olunur ki, guya mən partiya daxili fəaliyyətsizliyimə don geyindirmək istəmişəm. Onu vurğulayım ki, mətbuat və ictimaiyyət nümayəndələri yaxşı bilir ki, son il yarımda partiyanın 80 faiz tədbirləri gənclər təşkilatı adından edilib və bunu da həyata keçirən birbaşa mən olmuşam. Bu, danılası fakt deyil, çünki virtual mətbuatda hamısı var. İkincisi, mənim hər hansı seçki və bu seçkidən nəsə əldə etmək kimi bir marağım yoxdur ki, mətbuatın gündəmində qalmağa çalışım. Məni hər kəs yaxşı tanıyır, hətta partiyanı mənim vasitəmlə tanıyan yüzlərlə ictimaiyyət nümayəndəsi təqdim edə bilərəm Sizə. Üçüncüsü, guya mən Fərəc Quliyevə yarınmaq üçün bunu etmişəm. Azərbaycan reallığını götürsək, kiminsə kiməsə yarınması üçün iki əsas vacib amil rol oynamalıdır: vəzifə və pul. MDHP-də bunların heç biri yoxdur. Vardısa da, il yarım müddətdə mən görmədim onu. Məhz bu səbəbdən, mənim nə marağım olsun ki, kiməsə yarınım?”
“Mən məsələnin birinci informasiya mətbuata ötürülən gün bağlanacağını düşünərək danışmamışdım. Fərəc bəy bir sıra informasiya agentliklərinə bildirmişdi ki, mən başqa işlərimi partiya işləri ilə çatdıra bilmədiyim üçün istefa vermişəm. Birincisi, partiya sədrinin açıqlaması ilə, partiya gəncləri adından verilən açıqlama (istefa verməyib yarınır sadəcə) arasında ziddiyyət var. İkincisi, mənim hər hansı başqa işim yoxdur, işsizəm, iş axtarışındayam. Bunu da açıqlamayacaqdım amma demək məcburiyyətində qoydular məni.”
