Fərid Şahbazlının 24 yaşı tamam oldu

“İslahatçı Gənclər” İctimai Birliyinin sədri, Editor.az İnformasiya Portalının baş redaktoru Fərid Şahbazlının növbəti doğum gününü qeyd edir. Fərid Şahbazlının 24 yaşı tamam olur.

Fərid Şahbazlı 1991-ci ilin 28 noyabrında Bakı şəhərində anadan olub. 1998-2009-cu illərdə Səbail rayonu 7 saylı orta ümumtəhsil pilot məktəbində təhsil alıb. Məktəbdə oxuduğu illərdə 2 il 7 saylı orta ümumtəhsil pilot məktəbinin Şagird Parlamentinin sədri olub. Məktəb illərində dəfələrlə müxtəlif dövlət qurumları və QHT-lər tərəfindən Fəxri Fərmanlarla təltif edilib.

2009-2013-cü illərdə Odlar Yurdu Universitetində (OYU) jurnalistika ixtisasında bakalavr təhsili alıb və universiteti Fərqlənmə diplomu ilə bitirib. Universitetin ilk ilindən Tələbə Gənclər Təşkilatının İdarə Heyətinin üzvü olub, daha sonra ictimai fəaliyyətini universitetin Tələbə-Elmi Cəmiyyətinin sədri kimi davam etdirib. Universitet illərində iki il ard-arda fəal tələbə kimi OYU-nun Fəxri Fərmanı ilə təltif edilib.

Hazırda təhsilini magistratura pilləsində Türkiyənin İstanbul Aydın Universitetinin "Halkla İlişkilər və Tanıtım" ixtisasında davam etdirir. Eyni zamanda bu ay keçirilən seçkilərdə İstanbul Aydın Universitetinin 3700-dən artıq tələbəni ətrafında birləşdirən Beynəlxal Tələbələr Birliyinin sədri seçilib.

2011-ci ildən etibarən “Gənc Liderlər” Uşaq Təşkilatının bazasında yaradılan və dövlət qeydiyyatına alınmış “İslahatçı Gənclər” İctimai Birliyinin sədridir.

2009-2012-ci illərdə Qaynar.info Milli Xəbər Portalına rəhbərlik edib. Hazırda Editor.az İnformasiya Portalının baş redaktorudur.

Gənc və dəyərli həmkarımızı təbrik edir, şəxsi və iş həyatında bol-bol uğurlar diləyirik!